ടൈഗര്‍ ഷ്രോഫിന് നേരെ വെടിവെപ്പ്: നേപ്പാളിലേക്ക് കടക്കാന്‍ ശ്രമിച്ച മൂന്ന് പേര്‍ പിടിയില്‍; പിടിയിലായവരില്‍ പ്രായപൂര്‍ത്തിയാകത്തവരും

മുംബൈ: ബോളിവുഡ് താരം ടൈഗര്‍ ഷ്രോഫിനെ ലക്ഷ്യമിട്ട് മുംബൈയിലെ ജുഹുവില്‍ വെടിവെപ്പ് നടത്തിയ സംഭവത്തില്‍ മൂന്ന് പേര്‍ പിടിയില്‍. ഒക്ടോബര്‍ 18 ഞായറാഴ്ച വൈകിട്ടായിരുന്നു സംഭവം. ഫുട്‌ബോള്‍ ഗ്രൗണ്ടില്‍നിന്ന് മടങ്ങുകയായിരുന്ന താരത്തിന് പരിക്കേറ്റില്ല. എന്നാല്‍ താരത്തിന്റെ ഡ്രൈവര്‍ക്കും ഒരു ഓട്ടോറിക്ഷാ ഡ്രൈവര്‍ക്കും പരിക്കേറ്റതായാണ് റിപ്പോര്‍ട്ട്. സംഭവത്തിന് പിന്നാലെ രക്ഷപ്പെട്ട പ്രതികളെ രാജസ്ഥാനിലെ കോട്ട റെയില്‍വേ സ്റ്റേഷനില്‍നിന്നാണ് പിടികൂടിയത്. രാജസ്ഥാന്‍ പൊലീസും ആന്റി ഗ്യാങ്സ്റ്റര്‍ ടാസ്‌ക് ഫോഴ്‌സും (എജിടിഎഫ്) സംയുക്തമായി നടത്തിയ പരിശോധനയിലാണ് മൂന്നുപേരും പിടിയിലായത്. ഇവരെ മുംബൈ പൊലീസിന് കൈമാറുമെന്ന് കോട്ട പൊലീസ് അറിയിച്ചു.

വെടിവെപ്പിന് പിന്നാലെ പ്രതികള്‍ നേപ്പാളിലേക്ക് കടക്കാന്‍ പദ്ധതിയിട്ടിരുന്നതായി മുംബൈ പൊലീസ് തിങ്കളാഴ്ച നടത്തിയ വാര്‍ത്താസമ്മേളനത്തില്‍ വ്യക്തമാക്കി. പിടിയിലായവരില്‍ 17 വയസ്സുള്ള പ്രായപൂര്‍ത്തിയാകാത്ത ഒരാളുമുണ്ട്. ബിഹാറിലെ ബെഗുസരായില്‍ നിന്നുള്ള ഹൃതിക് കുമാര്‍ എന്ന റോഷന്‍ (22), ഹരിയാനയിലെ സോനിപത്തില്‍ നിന്നുള്ള റെയ്ഹാന്‍ (18) എന്നിവരാണ് മറ്റു രണ്ടുപേര്‍. മഹാരാഷ്‌ട്ര മുഖ്യമന്ത്രി ദേവേന്ദ്ര ഫഡ്നാവിസ് ടൈഗര്‍ ഷ്രോഫുമായി സംസാരിക്കുകയും കുറ്റക്കാര്‍ക്കെതിരെ ശക്തമായ നടപടി ഉറപ്പുനല്‍കുകയും ചെയ്തു. ഇത്തരം സംഭവങ്ങള്‍ അനുവദിക്കില്ലെന്ന് അദ്ദേഹം വ്യക്തമാക്കി.

പ്രതികള്‍ മഹാരാഷ്‌ട്രയ്‌ക്ക് പുറത്തുനിന്ന് പ്രവര്‍ത്തിച്ചവരാണെന്നും വിദേശത്തുനിന്നുള്ള ബന്ധം ഉള്‍പ്പെടെയുള്ള സാധ്യതകള്‍ പരിശോധിക്കുമെന്നും അദ്ദേഹം പറഞ്ഞു. അന്വേഷണത്തിന്റെ ഭാഗമായി മറ്റു സംസ്ഥാനങ്ങളിലെ പൊലീസുമായും കേന്ദ്ര ഏജന്‍സികളുമായും സഹകരിക്കുമെന്നും അറിയിച്ചു. വെടിവെപ്പിന് ശേഷം പ്രതികള്‍ രക്ഷപ്പെട്ട വഴി മുംബൈ ക്രൈംബ്രാഞ്ച് പുനഃസൃഷ്ടിച്ചു. വെടിവെപ്പ് നടത്തിയ ശേഷം മോട്ടോര്‍സൈക്കിളില്‍ രക്ഷപ്പെട്ട സംഘം അന്ധേരി റെയില്‍വേ സ്റ്റേഷനിലെത്തി. അവിടെനിന്ന് ലോക്കല്‍ ട്രെയിനില്‍ ബോറിവലിയിലേക്ക് യാത്ര ചെയ്തു.

Don’t miss the latest breaking news and updates! Subscribe to Janam TV’s WhatsApp channel now…

https://whatsapp.com/channel/0029Va4LMqWE50UdrVhraq0y

ബോറിവലിയില്‍നിന്ന് ഒരാള്‍ സൂറത്തിലേക്ക് പോകാന്‍ ടാക്‌സി ബുക്ക് ചെയ്തു. സൂറത്തില്‍നിന്ന് സംസ്ഥാന ഗതാഗത ബസില്‍ തുടര്‍യാത്ര നടത്താനായിരുന്നു ആദ്യം പദ്ധതിയിട്ടത്. എന്നാല്‍ തുടര്‍ന്നുള്ള യാത്രാമാര്‍ഗം കണ്ടെത്താന്‍ ബുദ്ധിമുട്ടിയതോടെ സംഘം സൂറത്ത് റെയില്‍വേ സ്റ്റേഷനിലേക്ക് തിരക്കിട്ട് എത്തി കോട്ടയിലേക്ക് പോകുന്ന ട്രെയിനില്‍ കയറുകയായിരുന്നു. മോട്ടോര്‍സൈക്കിള്‍, ലോക്കല്‍ ട്രെയിന്‍, ടാക്‌സി, ദീര്‍ഘദൂര ട്രെയിന്‍ എന്നിങ്ങനെ പല മാര്‍ഗങ്ങളിലൂടെയാണ് പ്രതികള്‍ മുംബൈയില്‍നിന്ന് കോട്ടയിലെത്തിയതെന്ന് ക്രൈംബ്രാഞ്ച് ഉദ്യോഗസ്ഥന്‍ വ്യക്തമാക്കി. സംഭവത്തില്‍ കൂടുതല്‍ അന്വേഷണം തുടരുകയാണ്.