ഹൈദരാബാദ്: റിയോ ഒളിമ്പിക്സില് രാജ്യത്തിന് അഭിമാനകരമായ നേട്ടം നല്കിയ
സാക്ഷി മാലിക്, പി.വി സിന്ധു, ദിപ കര്മാക്കര് എന്നിവര്ക്ക് സ്നേഹസമ്മാനമായി ബിഎംഡബ്ല്യൂ കാറുകള്. ഹൈദരാബാദ് ജില്ലാ ബാഡ്മിന്റണ് അസോസിയേഷന് പ്രസിഡന്റ് വി. ചാമുണ്ഡേശ്വര്നാഥ് ആണ് കാറുകള് സമ്മാനമായി നല്കിയത്. ക്രിക്കറ്റ് താരം സച്ചിന് ടെന്ഡുല്ക്കര് ആണ് താക്കോല് കൈമാറിയത്.
ചരിത്രം കുറിച്ച് ഒളിമ്പിക്സ് ബാഡ്മിന്റണില് വെള്ളി മെഡല് നേടിയ സിന്ധുവിന്റെ പരിശീലകന് പുല്ലേല ഗോപീചന്ദിനും കാര് സമ്മാനിച്ചു. ഹൈദരാബാദിലെ ഗോപീചന്ദ് ബാഡ്മിന്റണ് അക്കാദമിയില് നടന്ന ചടങ്ങിലാണ് വാഹനങ്ങളുടെ താക്കോല് സച്ചിന് ഇവര്ക്ക് കൈമാറിയത്. സമ്മാനം നല്കിയ ശേഷം താരങ്ങള്ക്കൊപ്പം സെല്ഫിയെടുത്ത് ട്വിറ്ററില് പോസ്റ്റ് ചെയ്യാനും സച്ചിന് മറന്നില്ല.
വിജയകരമായ പ്രകടനം തുടരണമെന്നും രാജ്യത്തിന് കൂടുതല് അഭിമാനകരമായ നേട്ടങ്ങള് ആവര്ത്തിക്കണമെന്നും സച്ചിന് മൂവരോടും പറഞ്ഞു. രാജ്യത്തിന് വേണ്ടി ഇവര് കൂടുതല് മെഡലുകള് കൊണ്ടുവരുമെന്ന് തനിക്ക് ഉറപ്പുണ്ടെന്നും അദ്ദേഹം പറഞ്ഞു.