ന്യൂഡല്‍ഹി: നോട്ടുകള്‍ പിന്‍വലിച്ചതുകൊണ്ട് ജനങ്ങള്‍ നേരിടുന്ന ബുദ്ധിമുട്ട് കുറയ്ക്കാന്‍ ബാങ്ക് ജീവനക്കാര്‍ രാവിലെ മുതല്‍ രാത്രിവരെ കഠിനമായി ജോലി ചെയ്യുന്നുണ്ടെന്ന് കേന്ദ്ര ധനമന്ത്രി അരുണ്‍ ജെയ്റ്റ്‌ലി. ജനങ്ങളും നന്നായി സഹകരിക്കുന്നുണ്ടെന്നും ശാന്തരാകുകയാണ് വേണ്ടതെന്നും മന്ത്രി പറഞ്ഞു. ഡല്‍ഹിയില്‍ ബാങ്ക് മേധാവികളുമായി കൂടിക്കാഴ്ച നടത്തിയ ശേഷം പ്രതികരിക്കുകയായിരുന്നു ജെയ്റ്റ്‌ലി. ഈ പരീക്ഷണഘട്ടത്തില്‍ ജനങ്ങള്‍ കാട്ടുന്ന പക്വതയെയും ക്ഷമയെയും അഭിനന്ദിക്കുന്നതായും അദ്ദേഹം കൂട്ടിച്ചേര്‍ത്തു.
നോട്ടുകള്‍ പിന്‍വലിച്ച ശേഷമുളള സ്ഥിതി ധനമന്ത്രാലയം സൂക്ഷ്മമായി നിരീക്ഷിക്കുന്നുണ്ടെന്നും മന്ത്രി വ്യക്തമാക്കി. ഇത്തരമൊരു തീരുമാനം മുന്‍കൂട്ടി അറിയിച്ചില്ലെന്ന വിമര്‍ശനത്തെയും ജെയ്റ്റ്‌ലി തളളിക്കളഞ്ഞു. അത് അസാധ്യമായിരുന്നുവെന്ന് ചൂണ്ടിക്കാട്ടിയ അദ്ദേഹം സര്‍ക്കാര്‍ തീരുമാനത്തോട് പലകോണുകളില്‍ നിന്നും രാഷ്ട്രീയ പ്രതികരണങ്ങള്‍ വരുന്നുണ്ടെന്നും ഇതില്‍ ചിലത് തീര്‍ത്തും നിരുത്തരവാദപരമാണെന്നും കൂട്ടിച്ചേര്‍ത്തു. പലതരത്തിലുളള ഊഹാപോഹങ്ങള്‍ പ്രചരിക്കുന്നുണ്ട്. ജനങ്ങള്‍ അതില്‍ വിശ്വസിക്കരുത്. ഉപ്പിന് വില വര്‍ധിച്ചുവെന്ന് ഉള്‍പ്പെടെയുളള പ്രചാരണങ്ങള്‍ ഇതിന്റെ ഭാഗമാണ്.
സര്‍ക്കാര്‍ തീരുമാനത്തിന് മുന്‍പ് ബാങ്ക് നിക്ഷേപങ്ങളില്‍ വര്‍ധനയുണ്ടായെന്ന തരത്തിലുളള പ്രചാരണം അടിസ്ഥാന രഹിതമാണെന്ന് അദ്ദേഹം പറഞ്ഞു. സെപ്തംബറില്‍ മാത്രമാണ് ബാങ്കുകളിലെ നിക്ഷേപത്തില്‍ വര്‍ധന രേഖപ്പെടുത്തിയത്. ഏഴാം ശമ്പളകമ്മീഷന്‍ ശുപാര്‍ശ അനുസരിച്ചുളള ആനുകൂല്യങ്ങള്‍ സര്‍ക്കാര്‍ നല്‍കിയത് സെപ്തംബറിലാണ്. നിക്ഷേപത്തില്‍ വര്‍ധന വന്നതിന്റെ പ്രധാന കാരണം ഇതാണെന്നും ജെയ്റ്റ്‌ലി പറഞ്ഞു.
വിപണിയില്‍ ഉളള നോട്ടുകള്‍ പിന്‍വലിക്കാന്‍ തീരുമാനമെടുക്കുമ്പോള്‍ പൊതുജനങ്ങള്‍ക്ക് അല്‍പം ബുദ്ധിമുട്ട് സൃഷ്ടിക്കുമെന്ന് സര്‍ക്കാരിന് മുന്‍കൂട്ടി മനസിലാക്കാവുന്നതേ ഉളളൂ. ആ ബുദ്ധിമുട്ടുകള്‍ കുറയ്ക്കാന്‍ സാദ്ധ്യമായ എല്ലാ നടപടികളും സ്വീകരിക്കുകയെന്നതാണ് ചെയ്യാനുളളതെന്നും ധനമന്ത്രി പറഞ്ഞു. ഇന്ന് ഉച്ചയ്ക്ക് 12.15 വരെ 58 ലക്ഷം ജനങ്ങള്‍ ബാങ്കുകളില്‍ നിന്ന് പഴയ കറന്‍സികള്‍ മാറ്റിയെടുത്തു.
രണ്ട് കോടി 28 ലക്ഷം രൂപയുടെ ഇടപാടുകളാണ് എസ്ബിഐ വഴി മാത്രം നടന്നത്. നിക്ഷേപങ്ങളും കറന്‍സി കൈമാറ്റവും ഉള്‍പ്പെടെയാണ് ഈ കണക്കെന്നും ജെയ്റ്റ്‌ലി പറഞ്ഞു. 2000 രൂപ നോട്ടുകള്‍ എടിഎമ്മുകളില്‍ ഉള്‍ക്കൊളളിക്കാന്‍ സമയം എടുക്കുമെന്നും ഇതിനുളള നടപടികള്‍ നടക്കുന്നുണ്ടെന്നും അരുണ്‍ ജെയ്റ്റ്‌ലി വ്യക്തമാക്കി. രണ്ടോ മൂന്നോ ആഴ്ചകള്‍ കൊണ്ട് മാത്രമേ ഈ നടപടി പൂര്‍ത്തിയാകൂ.
ആപ് ഡൌണ്‍ലോഡ് ചെയ്യൂ.