ന്യൂഡല്ഹി: 1000 ത്തിന്റെയും 500 ന്റെയും നോട്ടുകള് പിന്വലിച്ചതുമായി ബന്ധപ്പെട്ട് ജനങ്ങള് ആശങ്കപ്പെടേണ്ടെന്ന് ആര്ബിഐ. ബാങ്കുകളില് ആവശ്യത്തിന് പണം ഉണ്ടെന്നും അതുകൊണ്ടു തന്നെ പണം പിന്വലിച്ച് പൂഴ്ത്തിവെയ്ക്കേണ്ട കാര്യമില്ലെന്നും ആര്ബിഐ വ്യക്തമാക്കി. ഒരേ വ്യക്തികള് തന്നെ തുടര്ച്ചയായി ബാങ്കുകളിലെത്തി പണം പിന്വലിക്കുന്നത് ശ്രദ്ധയില്പെട്ട സാഹചര്യത്തിലാണ് ആര്ബിഐയുടെ വിശദീകരണം.
ആവശ്യമുളളപ്പോള് ജനങ്ങള്ക്ക് ബാങ്കിലെത്തി പണം പിന്വലിക്കാം. അല്ലാതെ ബാങ്കുകളില് പണം തീരുമെന്ന തെറ്റിദ്ധാരണയില് ഒരുമിച്ച് പിന്വലിച്ച് സൂക്ഷിക്കേണ്ട കാര്യമില്ലെന്നും ആര്ബിഐ വ്യക്തമാക്കി. വിതരണം ചെയ്യുന്നതിനായി ബാങ്കുകളില് ചെറുകറന്സികളുടെ ലഭ്യത ഉറപ്പുവരുത്തിയിട്ടുണ്ടെന്നും ആര്ബിഐ അധികൃതര് അറിയിച്ചു. ചെറുനോട്ടുകള്ക്ക് ക്ഷാമം ഉണ്ടെന്ന പ്രചാരണത്തെ തുടര്ന്നാണ് ജനങ്ങള് പരിഭ്രാന്തരായത്.
തിങ്കളാഴ്ച ചില സംസ്ഥാനങ്ങളില് പ്രാദേശിക അവധിയായതിനാല് ഞായറാഴ്ചയും ബാങ്കുകളില് വലിയ തിരക്കാണ് അനുഭവപ്പെടുന്നത്. രാജ്യത്തെ ഏതാണ്ട് അറുപത് ശതമാനം എടിഎമ്മുകളുടെ പ്രവര്ത്തനം പുനസ്ഥാപിക്കാന് കഴിഞ്ഞിട്ടുണ്ടെന്നാണ് വിലയിരുത്തല്. അവധിയുളള സംസ്ഥാനങ്ങളില് എടിഎമ്മുകളില് പണം നിറയ്ക്കണമെന്ന് ഉള്പ്പെടെയുളള നിര്ദ്ദേശങ്ങള് നല്കിയിട്ടുണ്ട്.