BusinessNews

ഓണ്‍ലൈന്‍ ഇടപാട് പ്രോത്സാഹിപ്പിക്കാന്‍ കൂടുതല്‍ ഇളവുകളുമായി ധനമന്ത്രാലയം

ന്യൂഡല്‍ഹി: ഓണ്‍ലൈന്‍ ഇടപാടുകള്‍ പ്രോത്സാഹിപ്പിക്കാന്‍ കൂടുതല്‍ ഇളവുകളുമായി ധനമന്ത്രാലയം. ഓണ്‍ലൈന്‍ ഇടപാടിന്റെ ചാര്‍ജുകള്‍ ഇടപാടുകാരില്‍ നിന്ന് ഈടാക്കരുതെന്നും സ്വയം വഹിക്കണെന്നും സര്‍ക്കാര്‍ വകുപ്പുകള്‍ക്കും പൊതുമേഖലാസ്ഥാപനങ്ങള്‍ക്കും നിര്‍ദ്ദേശം നല്‍കിയിട്ടുണ്ടെന്ന് കേന്ദ്ര ധനമന്ത്രി അരുണ്‍ ജെയ്റ്റ്‌ലി പറഞ്ഞു. ഈ നിര്‍ദ്ദേശം പിന്തുടരാന്‍ ശ്രമിക്കണമെന്ന് സംസ്ഥാന സര്‍ക്കാരുകളോടും ആവശ്യപ്പെട്ടതായി അദ്ദേഹം പറഞ്ഞു.

2000 രൂപ വരെയുളള ഡിജിറ്റല്‍ പണമിടപാടുകള്‍ക്ക് സേവന നികുതി ഈടാക്കരുതെന്നും നിര്‍ദ്ദേശം നല്‍കി. പതിനായിരത്തില്‍ താഴെ ജനസംഖ്യയുളള രാജ്യത്തെ ഒരു ലക്ഷം വില്ലേജുകളില്‍ ഇലക്ട്രോണിക് പണമിടപാട് സാദ്ധ്യമാക്കുന്ന രണ്ട് പോയിന്റ് ഓഫ് സെയില്‍ മെഷീനുകള്‍ വീതം സൗജന്യമായി നല്‍കും.

ഡിജിറ്റല്‍, ഓണ്‍ലൈന്‍ പേമെന്റുകള്‍ നല്‍കുന്ന ഗുണഭോക്താക്കള്‍ക്ക് പ്രീമിയം തുകയുടെ പത്ത് ശതമാനം ഡിസ്‌കൗണ്ടോ ക്രെഡിറ്റോ നല്‍കണമെന്ന് പൊതുമേഖലാ ഇന്‍ഷുറന്‍സ് കമ്പനികളോട് നിര്‍ദ്ദേശിച്ചതായി മന്ത്രി പറഞ്ഞു. എല്‍ഐസിയുടെ ലൈഫ് ഇന്‍ഷുറന്‍സ് പോളിസികള്‍ക്ക് എട്ട് ശതമാനം ഡിസ്‌കൗണ്ടോ ക്രെഡിറ്റോ ലഭിക്കും. 4.2 കോടി കിസാന്‍ ക്രെഡിറ്റ് കാര്‍ഡ് ഉടമകള്‍ക്ക് നബാര്‍ഡിന്റെ സഹകരണത്തോടെ സഹകരണ ബാങ്കുകള്‍ വഴിയും ഗ്രാമീണ ബാങ്കുകള്‍ വഴിയും റൂപേ കിസാന്‍ കാര്‍ഡുകള്‍ വിതരണം ചെയ്യും.

ഓണ്‍ലൈനിലൂടെ ടിക്കറ്റ് ബുക്ക് ചെയ്യുന്ന റെയില്‍വേ യാത്രക്കാര്‍ക്ക് 10 ലക്ഷം രൂപ വരെയുളള അപകട ഇന്‍ഷുറന്‍സ് പരിരക്ഷ ലഭിക്കും. കാറ്ററിംഗ്, താമസം വിശ്രമമുറികള്‍ തുടങ്ങിയ റെയില്‍വേ സേവനങ്ങള്‍ക്ക് ഡിജിറ്റല്‍ പേമെന്റുകള്‍ നടത്തുന്നവര്‍ക്ക് അഞ്ച് ശതമാനം ഡിസ്‌കൗണ്ട് നല്‍കും. ജനുവരി മുതല്‍ സബര്‍ബന്‍ ട്രെയിനുകളില്‍ സീസണ്‍ ടിക്കറ്റ് എടുക്കുന്നവര്‍ക്ക് .5 ശതമാനം കിഴിവും നല്‍കുമെന്നും മന്ത്രി ഡല്‍ഹിയില്‍ അറിയിച്ചു.

1K Shares
Close
Close