ന്യൂഡല്ഹി: ഇന്ത്യന് ക്രിക്കറ്റ് താരം മുഹമ്മദ് ഷമിയെ വിമര്ശിച്ച് മത വാദികൾ. ഷമി ഭാര്യയുമൊത്തുള്ള ഫോട്ടോ ഫേസ്ബുക്കില് പോസ്റ്റ് ചെയ്തതിന് പിന്നാലെയാണ് ചീത്തവിളിയുമായി ഒരു വിഭാഗം ട്രോളന്മാരെത്തിയത്. ഇക്കഴിഞ്ഞ ശനിയാഴ്ചയാണ് ഷമിയും ഭാര്യ ഹസീന് ജഹീനും ഒരുമിച്ച് നില്ക്കുന്ന ഫോട്ടോ ഫേസ്ബുക്കില് പോസ്റ്റ് ചെയ്തത്.
ഇതിന് പിന്നാലെയാണ് ഹസീന് ജഹാന്റെ വസ്ത്രം ഇസ്ലാമികമല്ലെന്നും, നിങ്ങള്ക്ക് ഭാര്യയെ നല്ല നടപ്പ് പഠിപ്പിച്ചൂടെയെന്നും ചോദിച്ചുകൊണ്ട് പലരും സോഷ്യല്മീഡിയയിലൂടെ രംഗത്തെത്തിയത്. പഠാന് സഹോദരങ്ങളെ കണ്ടു പഠിക്കാനും, അവരുടെ ഭാര്യമാരില് നിന്ന് പര്ദ്ദ അണിയാനുള്ള പരിശീലനം നേടാനുമുള്ള നിര്ദേശങ്ങളും ഷമിക്ക് ലഭിച്ചു.
സംഭവം വിവാദമായതോടെ വിമര്ശകരുടെ വായടപ്പിക്കുന്നതായിരുന്നു ഷമിയുടെ അടുത്ത പോസ്റ്റുകള്. ഭാര്യയോടൊത്തുള്ള കൂടുതല് ഫോട്ടോകള് ഷമി ഫേസ്ബുക്കില് പോസ്റ്റ് ചെയ്തു.
അതിനിടെ ഷമിക്ക് പിന്തുണയുമായി മുന് ഇന്ത്യന് ക്രിക്കറ്റ് താരം മുഹമ്മദ് കൈഫ് രംഗത്തെത്തി. ഇത്തരം കമന്റുകള് നാണക്കേട് ഉണ്ടാക്കുന്നുവെന്നും ഷമിക്ക് ഞാന് പൂര്ണ്ണ പിന്തുണ നല്കുന്നുവെന്നും രാജ്യത്ത് ചര്ച്ച ചെയ്യേണ്ട നിരവധി പ്രശ്നങ്ങളുണ്ടെന്നും കൈഫ് ട്വിറ്ററില് കുറിച്ചു.
