മുംബൈ : ഐ പി എൽ പത്താം സീസണിൽ റോയൽ ചലഞ്ചേഴ്സിന് വീണ്ടും ദയനീയ തോൽവി . വാംഖഡേയിൽ നടന്ന മത്സരത്തിൽ മുംബൈ ഇന്ത്യൻസിനോട് അഞ്ചു വിക്കറ്റിനാണ് കോലിയുടെ ടീം പരാജയപ്പെട്ടത് .
ആദ്യം ബാറ്റ് ചെയ്ത റോയൽ ചലഞ്ചേഴ്സ് 20 ഓവറിൽ 162 റൺസാണെടുത്തത് . 43 റൺസെടുത്ത ഡിവില്ലിയേഴ്സും 35 റൺസെടുത്ത നേഗിയുമാണ് റോയൽ ചലഞ്ചേഴ്സിന് ഭേദപ്പെട്ട സ്കോർ സമ്മാനിച്ചത് . ക്യാപ്ടൻ വിരാട് കോലിക്ക് 20 റൺസെടുക്കാനേ കഴിഞ്ഞുള്ളൂ.
മറുപടി ബാറ്റിംഗിനിറങ്ങിയ മുംബൈക്ക് വേണ്ടി ക്യാപ്ടൻ രോഹിത് ശർമയാണ് മുന്നിൽ നിന്ന് പടനയിച്ചത് . 37 പന്തിൽ ആറു ഫോറുകളും ഒരു സിക്സുമടക്കം അൻപത്താറു റൺസെടുത്ത രോഹിത് കളി മുംബൈക്കനുകൂലമായി ഫിനിഷ് ചെയ്തു. 33 റൺസെടുത്ത ബട്ലറും 27 റൺസെടുത്ത നിധീഷ് റാണയും ക്യാപ്ടന് മികച്ച പിന്തുണ നൽകി.
പത്ത് മത്സരങ്ങളിൽ നിന്ന് പതിനാറു പോയിന്റുമായി ഒന്നാം സ്ഥാനത്താണ് മുംബൈ . പതിനൊന്ന് മത്സരങ്ങളിൽ നിന്ന് 5 പോയിന്റ് മാത്രമുള്ള ബാംഗളൂർ ടീം പ്ളേ ഓഫ് കാണാതെ പുറത്തായി.
