ആരോഗ്യമന്ത്രിയുടെ ഫൈവ് സ്റ്റാര് ചികിത്സയെ പരിഹസിച്ച് കെ സുരേന്ദ്രന്റെ ഫേസ് ബുക്ക് പോസ്റ്റ്. 5 വര്ഷത്തിനിടയില് ഇപ്പോഴുള്ളതും ഇനി വരാന് സാധ്യതയുള്ളതുമായ എല്ലാ രോഗങ്ങളും സര്ക്കാര് ചിലവില് ചികിത്സിച്ച് സുഖപ്പെടുത്തുന്ന മഹനീയ മാതൃക തെറ്റാണോ എന്നാണ് സുരേന്ദ്രന്റെ ചോദ്യം.
ജനം ടീവിക്കാരേ ദ്രോഹിക്കരുത്, ടീച്ചറുടെയും കുടുംബത്തിന്റെയും ആരോഗ്യം ഞങ്ങൾ മലയാളികൾക്ക് വളരെ ഉത്തരവാദിത്തമുള്ള കാര്യമാണ് എന്ന ആമുഖത്തോടെയാണ് ഫേസ് ബുക്ക് പോസ്റ്റിന്റെ തുടക്കം.
കണ്ട അലവലാതികൾ കിടക്കുന്ന സർക്കാർ ആശുപത്രിയിൽ അവർ പോയി കിടക്കണമെന്ന് വാശി പിടിക്കുന്നത് ദുരാഗ്രഹമാണ്. പാവപ്പെട്ടവരുടെ നേതാവാണെന്ന് പറഞ്ഞിട്ട് ഒരു 28,000ത്തിന്റെ കണ്ണട വെക്കാൻ പാടില്ലെന്ന് പറയുന്നത് നിങ്ങൾ മഞ്ഞക്കണ്ണട വെച്ചതു കൊണ്ടാണ്.
കുവൈറ്റ് ചാണ്ടി എഴുതിയെടുത്തതിന്റെ പകുതിയല്ലേ ടീച്ചർ കുടുംബസമേതം ചികിത്സിച്ചിട്ടും എഴുതിയെടുത്തുള്ളൂ എന്നും സുരേന്ദ്രന് പരിഹാസപൂർവ്വം ചോദിക്കുന്നു. സ്വകാര്യ ആശുപത്രികളിലെ ചികിത്സ നല്ല നിലയിലാണോ നടക്കുന്നത് എന്ന് പരിശോധിക്കേണ്ട ബാധ്യത ആരോഗ്യമന്ത്രിക്കില്ലേ എന്നാണ് അടുത്ത ചോദ്യം.
മന്ത്രിക്ക് തന്റെ ആരോഗ്യം നോക്കാതെ മറ്റുള്ളവരുടെ ആരോഗ്യം സംരക്ഷിക്കാൻ എങ്ങിനെ കഴിയും എന്ന ചോദ്യവും ബിജെപി സംസ്ഥാന ജനറൽ സെക്രട്ടറി ഉന്നയിക്കുന്നു. ജനം ടിവിക്ക് മാത്രമല്ലേ ഇങ്ങനെ ദോഷൈകദൃക്കാവാൻ കഴിഞ്ഞുള്ളൂ ഭാഗ്യം, മറ്റു മഹാചാനലുകൾ ഒന്നും ഇത്തരം തെറ്റിദ്ധാരണ പരത്താൻ മുന്നോട്ടു വന്നില്ലല്ലോ എന്ന പരിഹാസം വാർത്ത നൽകാത്ത മറ്റു ചാനലുകൾക്ക് നേരെയും. ആരോഗ്യമന്ത്രിയുടെ പഞ്ചനക്ഷത്ര ചികിത്സ പുറത്തുവിട്ട ജനം ടിവിയെ അഭിനന്ദിച്ചുള്ള കമന്റുകളാണ് പോസ്റ്റിന് താഴെ ഏറെയും.
