മുംബൈ: ഐപിഎല്ലില് തിരിച്ചുവരവ് ആവേശകരമാക്കി ചെന്നൈ സൂപ്പര് കിംഗ്സ്. വാങ്കഡെ സ്റ്റേഡിയത്തില് നടന്ന ഉദ്ഘാടന മത്സരത്തില് നിലവിലെ ചാമ്പ്യന്മാരായ മുംബൈ ഇന്ത്യന്സിനെ ഒരു വിക്കറ്റിനാണ് ചെന്നൈ കീഴടക്കിയത്. 166 റണ്സ് വിജയലക്ഷ്യം ഒരു പന്ത് ശേഷിക്കെ ചെന്നൈ മറികടന്നു.
17 ഓവറില് എട്ടു വിക്കറ്റിന് 119 റണ്സ് എന്ന നിലയില് തോല്വി മുന്നില് കണ്ട ചെന്നൈയ്ക്ക് നാടകീയ ജയം സമ്മാനിച്ചത് ഡ്വെയ്ന് ബ്രാവോയുടെ തകര്പ്പന് ഇന്നിംഗ്സ്. മഗ്ലനഗന് ഏറിഞ്ഞ 18ാം ഓവറില് രണ്ട് സിക്സും ഒരു ഫോറുമടക്കം ബ്രാവോ അടിച്ചുകൂട്ടിയത് 20 റണ്സ്. 30 പന്തില് 68 റണ്സാണ് ബ്രാവോ നേടിയത്.
തൊട്ടടുത്ത ഓവറില് ബുംറയെ മിഡ് വിക്കറ്റിലൂടെയും ലോങ് ഓഫിലൂടെയും മൂന്ന് തവണ സിക്സറിന് പറത്തിയ ബ്രാവോ അവസാന പന്തില് പുറത്താകുമ്പോള് ചെന്നൈയ്ക്ക് ജയിക്കാന് വേണ്ടത് 6 പന്തില് ഏഴു റണ്സ് മാത്രം.
പരുക്കേറ്റതിനെ തുടര്ന്ന് ക്രീസ് വിട്ട കേദാര് ജാദവ് മുസ്തഫിസൂര് റഹ്മാന് ഏറിഞ്ഞ അവസാന ഓവറിലെ ആദ്യ മൂന്നു പന്തിലും റണ്ണെടുക്കാനായില്ല. നാലാം പന്ത് ഷോര്ട്ട് ഫൈന് ലെഗിലൂടെ സിക്സറിന് പറത്തിയ ജാദവ്, അഞ്ചാം പന്ത് കവറിലൂടെ ബൗണ്ടറി കടത്തി ചെന്നൈയെ ജയത്തിലെത്തിച്ചു.
ആദ്യം ബാറ്റ് ചെയ്ത മുംബൈ നാലു വിക്കറ്റ്് നഷ്ടത്തിലാണ് 165 റണ്സ് എടുത്തത്. 20 റണ്സ് എടുക്കുന്നതിനിടെ രണ്ട് വിക്കറ്റ് നഷ്ടമായ മുംബൈയെ 43 റണ്സ് എടുത്ത സൂര്യകുമാര് യാദവിന്റെയും 40 റണ്സ് എടുത്ത ഇഷാന്ത് കിഷാന്റെയും തകര്പ്പന് ബാറ്റിംഗാണ് കരകയറ്റിയത്. കൃണാല് പാണ്ഡ്യ 22 പന്തില് 41 റണ്സ് എടുത്തു.