ബെര്ലിന്: ഇന്ത്യന് അത്ലറ്റിക്സില് സ്പ്രിന്റ് ഇനത്തിലെ പുതിയ പ്രതീക്ഷയായി ഉയര്ന്നുവരുന്ന അനിമേഷ് കുജൂര് വീണ്ടും ചരിത്രം കുറിച്ചു. ജര്മനിയിലെ വെറ്റ്സ്ലാറില് നടന്ന ‘പ്യൂമ ഫാസ്റ്റ് ആംസ് ഫാസ്റ്റ് ലെഗ്സ് 2026’ മീറ്റിലെ പുരുഷന്മാരുടെ 100 മീറ്റര് ഫൈനലില് 10.14 സെക്കന്ഡില് ഫിനിഷ് ചെയ്ത് രണ്ടാം സ്ഥാനം നേടിയ താരം, ഒരു ഇന്ത്യന് സ്പ്രിന്റര് വിദേശ മണ്ണില് കുറിക്കുന്ന ഏറ്റവും വേഗമേറിയ 100 മീറ്റര് സമയമെന്ന റെക്കോര്ഡ് സ്വന്തമാക്കി.
അനിമേഷിന്റെ കരിയറിലെ ഏറ്റവും മികച്ച വ്യക്തിഗത പ്രകടനവുമാണിത്. ഇതോടെ ഇന്ത്യന് അത്ലറ്റിക്സിന്റെ ചരിത്രത്തിലെ രണ്ടാമത്തെ മികച്ച 100 മീറ്റര് സമയം എന്ന നേട്ടവും ഒഡിഷ സ്വദേശിയായ താരം സ്വന്തമാക്കി. നിലവിലെ ദേശീയ റെക്കോര്ഡുകാരനായ ഗുരീന്ദര്വീര് സിങ്ങിന്റെ 10.09 സെക്കന്ഡ് മാത്രമാണ് ഇനി അനിമേഷിന് മുന്നിലുള്ളത്.
ഫൈനലിന് മുമ്പ് നടന്ന ഹീറ്റ്സില് തന്നെ 10.19 സെക്കന്ഡില് ഫിനിഷ് ചെയ്ത് ഒന്നാം സ്ഥാനക്കാരനായ അനിമേഷ് മികച്ച ഫോമിന്റെ സൂചന നല്കിയിരുന്നു. ഫൈനലില് അതിലും വേഗം ഓടി സ്വന്തം റെക്കോര്ഡ് വീണ്ടും മെച്ചപ്പെടുത്തിയ താരം, മുമ്പ് കുറിച്ചിരുന്ന 10.15 സെക്കന്ഡ് എന്ന വ്യക്തിഗത മികച്ച സമയം ഒരു നൂറിലൊന്ന് സെക്കന്ഡ് കൂടി കുറച്ചാണ് പുതിയ ചരിത്രമെഴുതിയത്.
200 മീറ്റര് ദേശീയ റെക്കോര്ഡുകാരനായ അനിമേഷ്, ഇപ്പോള് 100 മീറ്ററിലും ഇന്ത്യയിലെ ഏറ്റവും മികച്ച സ്പ്രിന്റര്മാരില് ഒരാളായി തന്റെ സ്ഥാനം ഉറപ്പിച്ചു. ഇന്ത്യന് അത്ലറ്റിക്സ് ചരിത്രത്തിലെ മികച്ച അഞ്ച് 100 മീറ്റര് സമയങ്ങളില് മൂന്നെണ്ണവും ഇപ്പോള് അനിമേഷിന്റെ പേരിലാണ് എന്നതാണ് അദ്ദേഹത്തിന്റെ സ്ഥിരതയുടെ തെളിവ്.
ഇന്ത്യയുടെ എക്കാലത്തെയും മികച്ച 100 മീറ്റര് സമയങ്ങള്:
ഗുരീന്ദര്വീര് സിങ് 10.09 സെക്കന്ഡ്
അനിമേഷ് കുജൂര് 10.14 സെക്കന്ഡ്
അനിമേഷ് കുജൂര് 10.15 സെക്കന്ഡ്
ഗുരീന്ദര്വീര് സിങ് 10.17 സെക്കന്ഡ്
അനിമേഷ് കുജൂര് 10.18 സെക്കന്ഡ്
നേരത്തെ ജൂണില് നടന്ന ദേശീയ അന്തര്സംസ്ഥാന അത്ലറ്റിക്സ് ചാമ്പ്യന്ഷിപ്പില് 20.74 സെക്കന്ഡില് 200 മീറ്റര് പൂര്ത്തിയാക്കി അന്താരാഷ്ട്ര മത്സരത്തിനുള്ള യോഗ്യത നേടിയതും അനിമേഷായിരുന്നു. അത്ലറ്റിക്സ് ഫെഡറേഷന് ഓഫ് ഇന്ത്യ നിശ്ചയിച്ചിരുന്ന 20.88 സെക്കന്ഡ് യോഗ്യതാ സമയത്തേക്കാള് മികച്ച പ്രകടനമാണ് അന്ന് താരം പുറത്തെടുത്തത്.
2025ല് 20.32 സെക്കന്ഡില് 200 മീറ്റര് ദേശീയ റെക്കോര്ഡ് സ്ഥാപിച്ച് ശ്രദ്ധ നേടിയ അനിമേഷ്, ഇപ്പോള് 100 മീറ്ററിലും അതിവേഗ മുന്നേറ്റം തുടരുകയാണ്. ദേശീയ റെക്കോര്ഡ് തിരിച്ചുപിടിക്കുക എന്ന ലക്ഷ്യത്തിലേക്കാണ് ഇനി ഇന്ത്യന് സ്പ്രിന്ററുടെ കണ്ണ്. നിലവിലെ ഫോം തുടരാനായാല് വരാനിരിക്കുന്ന അന്താരാഷ്ട്ര മത്സരങ്ങളില് ഇന്ത്യയുടെ മെഡല് പ്രതീക്ഷകളില് പ്രധാന പേരായി അനിമേഷ് മാറുമെന്ന വിലയിരുത്തലാണ് കായികലോകം നടത്തുന്നത്.
