ജയ്പൂര്: ഐപിഎല്ലില് ഡല്ഹി ഡെയര് ഡെവിള്സിനെതിരെ രാജസ്ഥാന് റോയല്സിന് ജയം. മഴയെ തുടര്ന്ന് ആറ് ഓവറായി ചുരുക്കിയ മത്സരത്തില് ഡെക്ക് വര്ത്ത് ലൂയിസ് നിയമപ്രകാരം 10 റണ്സിനാണ് രാജസ്ഥാന് ഡല്ഹിയെ കീഴടക്കിയത്. മലയാളി താരം സഞ്ജു വി സാംസണാണ് കളിയിലെ താരം.
ആദ്യം ബാറ്റ് ചെയ്ത രാജസ്ഥാന് റോയല്സ് 5 വിക്കറ്റിന് 153 റണ്സ് എടുത്തു നില്ക്കെ രസംകൊല്ലിയായി മഴയെത്തി. റോയല്സിന്റെ ഇന്നിംഗ്സില് 13 പന്തുകള് ബാക്കി നില്ക്കെയായിരുന്നു മഴ കളി തടസ്സപ്പെടുത്തിയത്.
രണ്ട് മണിക്കൂറിലേറെ നീണ്ട കാത്തിരിപ്പിനു ശേഷം 11.55ന് കളി പുനരാരംഭിച്ചപ്പോള് ഡല്ഹിയുടെ വിജയലക്ഷ്യം ആറ് ഓവറില് 71 റണ്സ്.
ആദ്യ ഓവറിലെ ആദ്യ പന്തില് കൊളിന് മന്റോ റണ്ണൗട്ട്. തുടര്ന്ന് ഋഷഭ് പന്തിനെ കൂട്ടുപിടിച്ച് മാക്സ് വെല്ലിന്റെ പോരാട്ടം. 12 പന്തില് 17 റണ്സുമായി മാക്സ് വെല് മടങ്ങിയതോടെ പന്തിന്റെയും മോറിസിന്റെയും കൂട്ടുകെട്ട്. അഞ്ചാം ഓവറിലെ അവസാന പന്തില് 20 റണ്സുമായി ഋഷഭ് പന്തും പവലിയനിലേക്ക്. അവസാന ഓവറില് 25 റണ്സ് ജയിക്കാന് വേണ്ടിയിരുന്ന ഡല്ഹിയ്ക്ക് നേടാനായത് 14 റണ്സ് മാത്രം
45 റണ്സ് എടുത്ത അജിങ്ക്യാ രഹാനെയും, 37 റണ്സ് എടുത്ത സഞ്ജു വി സാംസണുമാണ് പൊരുതാവുന്ന സ്കോര് രാജസ്ഥാന് സമ്മാനിച്ചത്. ഐപിഎല്ലില് ഡല്ഹിയ്ക്കെതിരെ രാജസ്ഥാന്റെ തുടര്ച്ചയായ ഏഴാം ജയമാണ് ജയ്പൂരിലേത്.