ഹൈദരാബാദ്: ഐപിഎല്ലില് ബൗളര്മാരുടെ കരുത്തില് മിന്നുന്ന ജയവുമായി സണ്റൈസേഴ്സ് ഹൈദരാബാദ് പ്ലേ ഓഫിലേക്ക്. റോയല് ചലഞ്ചേഴ്സ് ബാംഗ്ലൂരിനെ അഞ്ച് റണ്സിനാണ് ഹൈദരാബാദ് കീഴടക്കിയത്. 147റണ്സ് വിജയലക്ഷ്യം പിന്തുടര്ന്ന ബാംഗ്ലൂരിന് ആറ് വിക്കറ്റ് നഷ്ടത്തില് 141 റണ്സ് എടുക്കാനെ സാധിച്ചുള്ളു. നിര്ണായക മത്സരത്തിലെ തോല്വിയോടെ ബാംഗ്ലൂരിന്റെ പ്ലേ ഓഫ് സാധ്യത മങ്ങി.
വിജയ ലക്ഷ്യത്തിലേക്ക് ബാറ്റ് വീശിയ ബാംഗ്ലൂരിന് മികച്ച ഫോമിലുള്ള പാര്ത്ഥിവ് പട്ടേലിനെ തുടക്കത്തില് തന്നെ നഷ്ടമായി. 13 പന്തില് നിന്നും 20 റണ്സുമായി പാര്ത്ഥിവ് മടങ്ങി. മനന് വോറയെ കൂട്ടുപിടിച്ച് വിരാട് കൊഹ്ലി തിരിച്ചടിച്ചു. വൈകാതെ 8 റണ്സുമായി വോറയും മടങ്ങി. 30 പന്തില് 39 റണ്സ് എടുത്ത കൊഹ്ലിയെ ഷക്കീബ് അല് ഹസന് യൂസഫ് പഠാന്റെ കൈകളിലെത്തിച്ചു. തൊട്ടടുത്ത ഓവറില് ഡിവില്ലിയേഴ്സിനെ റാഷിദ് ഖാനും ബൗള്ഡാക്കി. മൊയിന് അലി സിദ്ദാര്ത്ഥ് കൗളിന്റെ പന്തില് സാഹയ്ക്ക് ക്യാച്ച് നല്കി മടങ്ങുമ്പോള് ബാംഗ്ലൂരിന്റെ സ്കോര് 84 റണ്സിന് അഞ്ച് വിക്കറ്റ്.
മന്ദീപ് സിംഗും ഗ്രാന്ദോമും പൊരുതിയെങ്കിലും ബാംഗ്ലൂരിനെ ജയത്തിലെത്തിക്കാനായില്ല. അവസാന ഓവറില് വിജയലക്ഷ്യം 12 റണ്സി്ലേക്ക് ചുരുങ്ങിയെങ്കിലും ഗ്രാന്ദോമിനെ അവസാന പന്തില് ബൗള്ഡാക്കി ഭുവനേശ്വര് കുമാര് ജയം സ്വന്തമാക്കി.
ആദ്യം ബാറ്റ് ചെയ്ത ഹൈദരാബാദ് നിശ്ചിത ഓവറില് 146 റണ്സിന് ഓള് ഔട്ടായി. കെയ്ന് വില്യംസണ് 56 ഉം ഷക്കീബ് അല് ഹസന് 35 ഉം റണ്സ് എടുത്തു. ആറു ബാറ്റ്സ്മാന്മാര് രണ്ടക്കം കാണാതെ പുറത്തായി. മുഹമ്മദ് സിറാജും ടിം സൗത്തിയും മൂന്ന് വിക്കറ്റ് വീതം വീഴ്ത്തി.