ബംഗലുരു: ഐപിഎല്ലില് സണ്റൈസേഴ്സ് ഹൈദരാബാദിനെ 14 റണ്സിന് കീഴടക്കി റോയല് ചലഞ്ചേഴ്സ് പ്ലേ ഓഫ് സാധ്യത നിലനിര്ത്തി. 219 റണ്സ് വിജയലക്ഷ്യം പിന്തുടര്ന്ന ഹൈദരാബാദിന് നിശ്ചിത ഓവറില് മൂന്ന് വിക്കറ്റ് നഷ്ടത്തില് 204 റണ്സ് എടുക്കാനെ സാധിച്ചുള്ളു. 13 മത്സരങ്ങളില് ആറു ജയവുമായി ബാംഗ്ലൂര് പോയിന്റ് പട്ടികയില് അഞ്ചാമതെത്തി.
ആദ്യം ബാറ്റ് ചെയ്ത ബാംഗ്ലൂരിന് പാര്ത്ഥിവ് പട്ടേലിനെയും വിരാട് കൊഹ്ലിയേയും തുടക്കത്തില് നഷ്ടമായി. ഡിവില്ലിയേഴ്സും മൊയിന് അലിയും മൂന്നാം വിക്കറ്റില് ക്രീസില് ഒന്നിച്ചതോടെ ബാംഗ്ലൂര് കുതിച്ചു. ഇരുവരും ചേര്ന്ന് 57 പന്തില് അടിച്ചു കൂട്ടിയത് 107 റണ്സ്. ഡിവില്ലിയേഴ്സ് 39 പന്തില് 69 ഉം അലി 34 പന്തില് 65 ഉം റണ്സ് എടുത്തു. അവസാന ഓവറുകളില് കൊളിന് ഡി ഗ്രാന്ദോമും സര്ഫ്രാസ് ഖാനും ആഞ്ഞടിച്ചതോടെ ബാംഗ്ലൂര് കൂറ്റന് സ്കോറിലെത്തി.
ഹൈദരാബാദിന് 18 റണ്സിന് ശിഖര് ധവാനെ നഷ്ടപ്പെട്ടെങ്കിലും അലക്സ് ഹെല്സിനെ കൂട്ടുപിടിച്ച് നായകന് കെയ്ന് വില്യംസണ് പൊരുതി. ഹെല്സ് 37 റണ്സുമായി മടങ്ങി. വില്യംസണൊപ്പം മനീഷ് പാണ്ഡെയും തകര്ത്തടിച്ചതോടെ ഹൈദരബാദിന് പ്രതീക്ഷയായി. ഇരുവരും ചേര്ന്ന് മൂന്നാം വിക്കറ്റില് 67 പന്തില് സ്കോര് ചെയ്തത് 135 റണ്സ്. അവസാന ഓവറില് വിജയലക്ഷ്യം 20 റണ്സായി ചുരുങ്ങിയെങ്കിലും കെയ്ന് വില്യംസണെ പുറത്താക്കി മുഹമ്മദ് സിറാജ് ബാംഗ്ലൂരിന്റെ ജയം ഉറപ്പാക്കി. വില്യംസണ് 42 പന്തില് 81 റണ്സ് എടുത്തു. മനീഷ് പാണ്ഡെ 38 പന്തില് 62 റണ്സുമായി പുറത്താകാതെ നിന്നു