മുംബൈ: ആവേശം നിറഞ്ഞ മത്സരത്തിനൊടുവില്‍ ഹൈദരാബാദിനെ തോല്‍പ്പിച്ച് ചെന്നൈ സൂപ്പര്‍ കിങ്‌സ് ഫൈനലില്‍. സണ്‍റൈസേഴ്‌സ് ഉയര്‍ത്തിയ 140 റണ്‍സ് വിജയലക്ഷ്യം അഞ്ചു പന്തു ബാക്കി നില്‍ക്കെ എട്ടു വിക്കറ്റ് നഷ്ടത്തില്‍ ചെന്നൈ മറികടന്നു.
ഹൈദരാബാദ് മുന്നോട്ടുവച്ച താരതമ്യേന ചെറിയ സ്‌കോര്‍ പിന്തുടര്‍ന്ന ചെന്നൈയുടെ തുടക്കം തകര്‍ച്ചയോടെയായാരുന്നു. വാട്‌സണ്‍ റണ്ണൊന്നുമെടുക്കാതെ പുറത്തായി. റെയ്‌ന (13 പന്തില്‍ 22), റായ്ഡു (1 പന്തില്‍ 0), ധോനി (18 പന്തില്‍ 9), ബ്രാവോ (11 പന്തില്‍ 7) എന്നിവര്‍ക്കും ടീമിനെ മുന്നോട്ടു കൊണ്ടു പോകാന്‍ കഴിഞ്ഞില്ല. ഒടുവില്‍ കളിയില്‍ നിര്‍ണായകമായത് ഫാഫ് ഡു പ്ലെസിസിന്റെ പ്രകടനമാണ്. 42 പന്തില്‍ നിന്നും 67 റണ്‍സാണ് ഫാഫ് നേടിയത്. ഷാര്‍ദുല്‍ ഠാകുറിന്റെ (5 പന്തില്‍15) ബാറ്റിങ്ങും ചെന്നൈയെ വേഗം ജയത്തിലെത്തിച്ചു. ഹൈദരാബാദിന് വേണ്ടി കൗള്‍, റാഷിദ്, സന്ദീപ് ശര്‍മ എന്നിവര്‍ രണ്ട് വിക്കറ്റ് വീതം വീഴ്‌ത്തി.
നിശ്ചിത ഓവറില്‍ ഏഴ് വിക്കറ്റ് നഷ്ടത്തിലാണ് ഹൈദരാബാദ് 139 റണ്‍സ് നേടിയത്. 43 റണ്‍സ് നേടിയ കാര്‍ലോസ് ബ്രാത്വെയ്റ്റാണ് ഹൈദരാബാദിന്റെ ടോപ് സ്‌കോറര്‍. ഈ കളിയില്‍ പരാജയപ്പെട്ടെങ്കിലും ഹൈദരാബാദിന് ഒരു അവസരം കൂടി ബാക്കി ഉണ്ട്. രാജസ്ഥാന്‍ റോയല്‍സും കൊല്‍ക്കത്ത നൈറ്റ് റൈഡേഴ്‌സും തമ്മില്‍ നടക്കുന്ന എലിമിനേറ്റര്‍ മത്സരത്തിലെ വിജയികളെ തോല്‍പ്പിച്ചാല്‍ ഇവര്‍ക്ക് ഫൈനലില്‍ കടക്കാം.
