കൊല്ക്കത്ത: ഐപിഎല്ലില് കൊല്ക്കത്ത നൈറ്റ് റൈഡേഴ്സ് രണ്ടാം ക്വാളിഫയറില്. കൊല്ക്കത്ത ഈഡന് ഗാര്ഡന്സില് നടന്ന എലിമിനേറ്റര് മത്സരത്തില് രാജസ്ഥാന് റോയല്സിനെ 25 റണ്സിന് കീഴടക്കിയാണ് നൈറ്റ് റൈഡേഴ്സ് ക്വാളിഫയറിലെത്തിയത്, ഓള്റൗണ്ട് മികവുമായി കൊല്ക്കത്തയുടെ ജയത്തില് നിര്ണായകമായ ആന്ദ്രെ റസലാണ് കളിയിലെ താരം.
170 റണ്സ് വിജയലക്ഷ്യം പിന്തുടര്ന്ന രാജസ്ഥാന് രാഹുല് ത്രിപാഠിയും അജിങ്ക്യാ രഹാനെയും നല്കിയത് മികച്ച തുടക്കം. 20 റണ്സ് എടുത്ത ത്രിപാഠിയെ പിയുഷ് ചൗള പുറത്താക്കുമ്പോള് രാജസ്ഥാന്റെ സ്കോര് 47 റണ്സ്. രഹാനെയ്ക്ക് കൂട്ടായി സജ്ഞു വി സാംസണ് എത്തിയതോടെ രാജസ്ഥാന് ജയപ്രതീക്ഷയായി. ഇരുവരും ചേര്ന്ന് രണ്ടാം വിക്കറ്റില് 62 റണ്സ് കൂട്ടിച്ചേര്ത്തു. 46 റണ്സെടുത്ത രഹാനെയെ കുല്ദീപ് യാദവ് പുറത്താക്കുമ്പോള് രാജസ്ഥാന് ജയിക്കാന് വേണ്ടത് 61 റണ്സ്. അര്ദ്ധ സെഞ്ചുറി പൂര്ത്തിയാക്കിയ ഉടന് സഞ്ജു പുറത്തായതോടെ രാജസ്ഥാന് പ്രതിരോധത്തിലായി.
ഡത്ത് ഓവറുകളില് മികച്ച ബൗളിംഗ് പുറത്തെടുത്ത കൊല്ക്കത്ത രാജസ്ഥാന്റെ മധ്യനിരയെ വരിഞ്ഞുമുറുക്കി.ഹെന്ട്രിച്ച് ക്ലാസനും കൃഷ്ണപ്പ ഗൗതമിനും സ്കോറിംഗ് വേഗം കൂട്ടാനാവാതെ വന്നതോടെ രാജസ്ഥാന്റെ പോരാട്ടം 144 റണ്സില് അവസാനിച്ചു.
51 റണ്സ് എടുക്കുന്നതിനിടെ നാലു വിക്കറ്റ് നഷ്ടപ്പെട്ട കൊല്ക്കത്തയെ കരകയറ്റിയത് ദിനേശ് കാര്ത്തിക്കിന്റെ മികച്ച ഇന്നിംഗ്സ്. ശുഭ്മാന് ഗില്ലിനും ആന്ദ്രെ റസലിനുമൊപ്പം മികച്ച കൂട്ടുകെട്ട് പടുത്തുയര്ത്തിയ കാര്ത്തിക് 38 പന്തില് 52 റണ്സെടുത്തു. അവസാന ഓവറുകളില് ആഞ്ഞടിച്ച റസല് 25 പന്തില് അഞ്ച് സിക്സറും മൂന്ന് ബൗണ്ടറികളും ഉള്പ്പടെ 49 റണ്സുമായി പുറത്താകാതെ നിന്നു.
നാളെ നടക്കുന്ന രണ്ടാം ക്വാളിഫയറില് കൊല്ക്കത്ത സണ്റൈസേഴ്സ് ഹൈദരാബാദുമായി ഏറ്റുമുട്ടും.