കീവ്: യുവേഫ ചാമ്പ്യന്‍സ് ലീഗില്‍ റയല്‍ മാഡ്രിഡിന് ഹാട്രിക് കിരീടം. ഫൈനലില്‍ ലിവര്‍ പൂളിനെ ഒന്നിനെതിരേ മൂന്നു ഗോളുകള്‍ക്ക് തോല്‍പ്പിച്ചാണ് റയല്‍ 13ാം യൂറോപ്യന്‍ കിരീടത്തില്‍ മുത്തമിട്ടത്. റയലിനുവേണ്ടി ഗാരെത് ബെയില്‍ രണ്ടും കരീം ബെന്‍സേമ ഒരുഗോളും നേടി. സാദിയോ മാനേയുടെ വകയായിരുന്നു ലിവര്‍ പൂളിന്റെ ആശ്വാസഗോള്‍. സലായുടെ പരിക്കും ലിവര്‍പൂള്‍ ഗോളി ലോറിസ് കറിയൂസിന്റെ ഇരട്ടപ്പിഴവുമാണ് മത്സരത്തിന്റെ വിധിയെഴുതിയത്.
ലിവര്‍പൂളിന്റെ ഈജിപ്ഷ്യന്‍ താരം മുഹമ്മദ് സലായും റയലിന്റെ സൂപ്പര്‍ സ്റ്റാര്‍ ക്രിസറ്റിയാനോ റൊണാള്‍ഡോയും തമ്മിലുള്ള പോരാട്ടമാണ് ആരാധകര്‍ പ്രതീക്ഷിച്ചത്. സലായുടെ പരിക്കും ലിവര്‍പൂള്‍ ഗോളി ലോറിസ് കറിയൂസിന്റെ ഇരട്ടപ്പിഴവും മത്സരത്തിന്റെ വിധിയെഴുതുകയായിരുന്നു.
ലിവര്‍പൂളിന്റെ മുന്നേറ്റത്തോടെയായിരുന്നു തുടക്കം. എന്നാല്‍ ലിവര്‍പൂള്‍ മുന്നേറ്റങ്ങള്‍ക്ക് ചുക്കാന്‍ പിടിച്ച സലാ 27ാം മിനിറ്റില്‍ പരിക്കേറ്റ് മടങ്ങിയത് ഇംഗ്ലീഷ് ക്ലബ്ബിന് വന്‍ തിരിച്ചടിയായി. സലായെ തടയാനുള്ള റയല്‍ ക്യാപ്റ്റന്‍ സര്‍ജിയോ റാമോസിന്റെ ശ്രമമാണ് പരിക്കിന് കാരണമായത്. തോളിടിച്ച് വീണ സലാ കണ്ണീരോടെ കളം വിട്ടത് വേദനിക്കുന്ന ഓര്‍മ്മയായി.
അധികം വൈകാതെ റയല്‍ പ്രതിരോധ നിരയിലെ പ്രധാനി ഡാനി കര്‍വജാലും പരിക്കേറ്റ് മടങ്ങി. രണ്ടാം പകുതിയിലാണ് എല്ലാ ഗോളുകളും പിറന്നത്. ലോറിസ് കറിയൂസിന്റെ പിഴവ് മുതലെടുത്ത് കരീം ബെന്‍സേമ 51ാം മിനിറ്റില്‍ റയലിനെ മുന്നിലെത്തിച്ചു. 55ാം മിനിറ്റില്‍ ലഭിച്ച കോര്‍ണറില്‍ നിന്നും സാദിയോ മാനേ ലിവര്‍പൂളിനെ ഒപ്പമെത്തിച്ചു. 61ാം മിനിറ്റില്‍ ഇസ്‌കോയെ പിന്‍വലിച്ച് ഗാരെത് ബെയിലിനെ ഇറക്കാനുള്ള സിദാന്റെ തീരുമാനം റയലിന് ഭാഗ്യം കൊണ്ടുവന്നു. 64ാം മിനിറ്റില്‍ ചാമ്പ്യന്‍സ് ലീഗ് കണ്ടിട്ടുള്ളതില്‍ വച്ച് ഏറ്റവും മനോഹരമായ ഗോളുകളില്‍ ഒന്നിലൂടെ ബെയില്‍ റയലിനെ മുന്നിലെത്തിച്ചു. 83ാം മിനിറ്റില്‍ എതിര്‍ ഗോളിയുടെ പിഴവിലൂടെ ബെയിലിന്റെ ജയം ഉറപ്പിച്ച ഗോള്‍.
റയലിന്റെ തുടര്‍ച്ചയായ മൂന്നാമത്തേതും ആകെ 13ാം കിരീടവുമാണിത്. കോച്ചെന്ന നിലയില്‍ സിദാന്റെ മൂന്നാം ചാമ്പ്യന്‍പട്ടവും, കളിക്കാരനെന്ന നിലയില്‍ ക്രിസ്റ്റിയാനോയുടെ അഞ്ചാം യൂറോപ്യന്‍ കിരീടവുമാണിത്.
