കോഴിക്കോട്: ലോകകപ്പ് ഫുട്ബോളിന് പന്തുരുളാന്‍ പത്തു ദിവസം മാത്രമെ അവശേഷിക്കുന്നുള്ളുവെങ്കിലും നിപ വൈറസ് ബാധയെ തുടര്‍ന്ന് നിശ്ചലമായ കോഴിക്കോട് , മലപ്പുറം ജില്ലകള്‍ ഇപ്പോഴും പൂര്‍ണമായ കളി ആവേശത്തിലേക്ക് എത്തിയിട്ടില്ല. എങ്കിലും പോസ്റ്ററുകളും ബോര്‍ഡുകളുമൊക്കെയായി ഒരു കൂട്ടം ആരാധകര്‍ രംഗത്തിറങ്ങിയെന്നത് ആശ്വാസമേകുന്ന കാഴ്ചയാണ്. പരമ്പരാഗത വൈരികളായ ബ്രസീലും അര്‍ജന്‍റീനയും തന്നെയാണ് ഫ്ലക്ല് ബോര്‍ഡുകളില്‍ നിറയുന്നത്.
പച്ചപുതച്ച മൈതാനത്ത് അര്‍ജന്‍റീനയും ബ്രസീലും ഏറ്റുമുട്ടുമ്പോള്‍ കാണാന്‍ കഴിയുന്നത് ലാറ്റിനമേരിക്കന്‍ ഫുട്ബോളിന്‍റെ മുഴുവന്‍ സൗന്ദര്യം കൂടിയാണ്. പരമ്പരാഗത വൈരികളാണെങ്കിലും പ്രധാന ടൂര്‍ണമെന്‍റുകളിലെല്ലാം ഇവര്‍ തമ്മിലുള്ള കലാശക്കളി ഉണ്ടാകണമെന്ന് ആഗ്രഹിക്കുന്ന വലിയൊരു വിഭാഗം ജനങ്ങള്‍ മലബാറിലുമുണ്ട്. അതു കൊണ്ട് തന്നെയാണ് റഷ്യയില്‍ നടക്കുന്ന ലോകകപ്പ് ഫുട്ബോളിനെ സ്വാഗതം ചെയ്തുകൊണ്ടും അര്‍ജന്‍റീനക്കും ബ്രസീലിനും പിന്തുണയേകിയും ഫാന്‍സുകാര്‍ ബോര്‍ഡുകള്‍ സ്ഥാപിച്ച് രംഗത്തിറങ്ങിയിരിക്കുന്നത്.
അടവ് പഠിപ്പിച്ചത് ബ്രസീലില്‍ നിന്നാണ് തമ്പുരാനെ … അര്‍ജന്‍റീന പടയില്‍ ആള്‍ബലം ഉണ്ടെങ്കില്‍ കല്‍പിച്ചോളൂ…. പക്ഷെ റഷ്യന്‍കവാടം വരെ ഞാന്‍ എന്തിന് എത്തിയോ അതും കൊണ്ടേ മടങ്ങൂ. എന്ന് പറയുന്ന നെയ്മര്‍ ഡ സില്‍വ സാന്‍റോസ് ജൂനിയര്‍ എന്ന നെയ്മറിന്‍റെ ചിത്രവുമായാണ് ബോര്‍ഡുകളും ഫ്ലക്സുകളുമൊക്കെ. ഒപ്പം ബ്രസീല്‍ ടീമംഗങ്ങളുടെ ചിത്രങ്ങളുമുണ്ട്. കൂടുതല്‍ ശ്രദ്ധിക്കുമ്പോഴാണ് പ്രിഥ്വിരാജിന്‍റെ പുറത്തിറങ്ങാനുള്ള സിനിമയായ കാളിയനിലെ ഡയലോഗിന്‍റെ അനുകരണമാണെന്ന് മനസിലാകുന്നത്.
അടവ് പഠിപ്പിച്ചത് സാംപോളിയാണ് മക്കളെ … കാനറി പടയിലും പറങ്കി പടയിലും ആള്‍ബലം ഇനിയുമുണ്ടെങ്കില്‍ കല്‍പിച്ചോളൂ…. പത്തുക്കൊന്നോ… നൂറുക്കൊന്നോ…. പക്ഷെ ഇക്വഡോര്‍ മലതാണ്ടി എന്തിനെത്തിയോ അതുംകൊണ്ടേ മടങ്ങൂ എന്ന മറുപടിയുമായി അര്‍ജന്റീനിയന്‍ ക്യാപ്റ്റന്‍ ലയണല്‍ മെസിയും അദ്ദേഹത്തിന്‍റെ ടീമുമുണ്ട്.
നിപ്പ വൈറസ് ബാധയെ തുടര്‍ന്ന് ഫുട്ബോള്‍ ആരാധകരുടെ ആവേശം ഔന്നത്യത്തിലേക്ക് എത്തി തുടങ്ങിയിട്ടില്ലെങ്കിലും പോസ്റ്ററുകളിലൂടെയുള്ള ആരാധക യുദ്ധം ആരംഭിച്ചു കഴിഞ്ഞു. തീച്ചൂളയില്‍ ജനിച്ച ഞങ്ങള്‍ എന്തിന് തീപ്പെട്ടികൊള്ളികളെ പേടിക്കണമെന്നും മഞ്ഞപ്പടയെ എതിരാളികളായി കിട്ടാതിരിക്കാന്‍ ഉളളുരുകി പ്രാര്‍ഥിച്ചോളൂ എന്നുമാണ് ബ്രസീല്‍ ആരാധകരുടെ മുന്നറിയിപ്പ്. എന്നാല്‍ ഇത്തവണ ചിലകളികള്‍ കാണിക്കാനും ചില കണക്കുകള്‍ തീര്‍ക്കാനുമാണ് റഷ്യയിലേക്ക് എത്തുന്നതെന്നും തളര്‍ത്താന്‍ കഴിഞ്ഞിട്ടില്ല പിന്നെയല്ലെ തകര്‍ക്കാന്‍ എന്ന വാഗ് ധോരണിയുമായി അര്‍ജന്‍റീനയുടെ ആരാധകരും എത്തിയതോടെ കളിക്കളത്തിന് പുറത്തുള്ള വാശി പടര്‍ന്നു തുടങ്ങി. ഇത് തന്നെയാണ് ലാറ്റിനമേരിക്കന്‍ ഫുട്ബോള്‍ സൗന്ദര്യത്തോളം വരുന്ന മലബാറുകാരുടെ കാല്‍പന്തുകളിയോടുള്ള പ്രണയവും.
