പ്രണയിക്കുന്നവരെ ഒന്നിപ്പിക്കാൻ പ്രണയസേന എത്തുന്നു

കൊച്ചി ; ഇരു ഹൃദയങ്ങളിൽ മൊട്ടിട്ട പ്രണയത്തിന് ഇനി കാവൽക്കാരായി അവർ എത്തുന്നു ‘ പ്രണയ സേന‘.

പ്രണയിച്ചതിന്റെ പേരിൽ ജീവൻ നഷ്ടപ്പെട്ട കെവിന്റെയും,നീനുവിന്റെയും ജീവിതത്തിലെ ദുരന്തമാണ് ഡൽഹി ആസ്ഥാനമായ ലൗവ് കമാൻഡോസ് കേരളത്തിലും പ്രണയ സേന രൂപീകരിക്കാൻ കാരണം.

രാജ്യത്ത് 52,000 പ്രണയവിവാഹങ്ങൾ നടത്തിക്കൊടുത്ത സംഘടനയാണിത്.സംസ്ഥാനത്തെ ഓരോ വാർഡിലും പത്തു പേർക്കാണ് പരിശീലനം നൽകുന്നത്.ഒരു വർഷത്തിനുള്ളിൽ പ്രണയിക്കുന്നവർക്ക് കരുത്ത് പകരാൻ ഇത്തരത്തിൽ ഒരു ലക്ഷം പേർ ഉൾപ്പെടുന്ന സേന രൂപീകരിക്കും.

പ്രണയസേനയുണ്ടാക്കുന്നതിന്റെ ഭാഗമായി ‘ലവ് കമാൻഡോസ് കേരളഘടകം 22-ന് കോഴിക്കോട് വെസ്റ്റ്ഹിൽ പോളിടെക്നിക് ഹാളിൽ കൂട്ടായ്മ സംഘടിപ്പിക്കും.

പ്രണയത്തിലായവർക്ക് ആവശ്യമായ മാർഗനിർദേശങ്ങൾ നൽകാനും, നിയമോപദേശം നൽകാനും വിദഗ്ദരുടെ സേവനവും ലഭ്യമാക്കും.

പ്രണയ ബന്ധത്തിലും,വൈവാഹിക ബന്ധത്തിലും പ്രശ്നങ്ങളുള്ളവർ ,സാമൂഹികമായ പിന്തുണ വേണ്ടവർ,ജീവിത പങ്കാളിയെ തേടുന്നവർ എന്നിവർക്കും ഈ കൂട്ടായ്മ സഹായകമാകും.