പോഷകഗുണങ്ങളാല് സമ്പന്നമായ പാലുല്പന്നമാണ് പനീര്. കാത്സ്യം, ഫോസ്ഫറസ് വിറ്റാമിന്, മിനറല്സ് എന്നിങ്ങനെ ശരീരത്തിന്റെ വളര്ച്ചയ്ക്ക് സഹായിക്കുന്ന ധാരാളം ഘടകങ്ങള് പനീറില് അടങ്ങിയിട്ടുണ്ട്. പ്രോട്ടീനുകളാല് സമൃദ്ധമായ പനീര് പാചകം ചെയ്യാനും വളരെ എളുപ്പമാണ്.
പനീറിലെ കാത്സ്യം, ഫോസ്ഫറസ് എന്നിവ എല്ലിന് തേയ്മാനം സംഭവിക്കുന്ന ഓസ്റ്റിയോപൊറോസിസ് പോലുള്ള അസുഖങ്ങളെയും സന്ധിരോഗങ്ങളെയും ഒരു പരിധിവരെ തടയാന് സഹായിക്കുന്നു. ദന്തരോഗങ്ങളെയും മോണരോഗങ്ങളെയും പനീറില് അടങ്ങിയിട്ടുള്ള മിനറല്സ് പ്രതിരോധിക്കുന്നു. വിറ്റാമിന് ഡി സമൃദ്ധമായതിനാല് പല്ലിലുണ്ടാകുന്ന പോടില് നിന്നും ആശ്വാസം നേടാം.
പനീര് വളരെ പെട്ടെന്ന് ഊര്ജം പ്രദാനം ചെയ്യുന്ന ഭക്ഷണമാണ്. അതുകൊണ്ട് തന്നെ കഠിനവ്യായാമത്തില് ഏര്പ്പെടുന്നവര്ക്കും കായികതാരങ്ങള്ക്കും വ്യായാമത്തിനുശേഷം കഴിക്കുന്ന ഭക്ഷണത്തില് പനീര് ഉള്പ്പെടുത്താവുന്നതാണ്. കുട്ടികളുടെ ഭക്ഷണത്തില് പനീര് തീര്ച്ചയായും ഉള്പ്പെടുത്തണം.
ശരീരത്തിന്റെ വളര്ച്ചയ്ക്കും രോഗപ്രതിരോധശക്തി വര്ധിപ്പിക്കുന്നതിനും പനീര് സഹായകരമാണ്. പ്രായമായവരുടെ ചര്മ്മത്തില് ഉണ്ടാകുന്ന ചുളിവുകള് മാറ്റുന്നതിനും തലമുടിയുടെ വളര്ച്ചയ്ക്കും പനീറില് അടങ്ങിയിരിക്കുന്ന വിറ്റമിന് ബി ഏറെ പ്രയോജനപ്രദമാണ്.
കാല്സ്യം, മഗ്നീഷ്യം തുടങ്ങിയ ധാതുക്കളുടെ സാന്നിധ്യവും ഇവയിലുണ്ട്. പനീറിലെ പ്രോട്ടീന് സാന്നിധ്യം രക്തത്തിലെ പഞ്ചസാര ഉല്പ്പാദനത്തിന്റെ വേഗത കുറക്കുകയും പെട്ടെന്ന് പഞ്ചസാരയുടെ അളവില് മാറ്റം വരുന്നതിനെ പ്രതിരോധിക്കുകയും ചെയ്യുന്നു. പനീറിലെ പൊട്ടാസ്യത്തിന്റെ സാന്നിധ്യം ശരീരത്തിലെ ഫ്ളൂയിഡ് ബാലന്സ് നിലനിര്ത്തി ഹൃദയാരോഗ്യത്തെ ശക്തിപ്പെടുത്തുന്നു.
