ബെംഗളൂരു: തിരഞ്ഞെടുപ്പ് രാഷ്ട്രീയത്തില് നിന്ന് വിരമിക്കുന്നതായി പ്രഖ്യാപിച്ച് മുന് കര്ണാടക മുഖ്യമന്ത്രിയും മുതിര്ന്ന കോണ്ഗ്രസ് നേതാവുമായ സിദ്ധരാമയ്യ. 2028ലെ കര്ണാടക നിയമസഭാ തിരഞ്ഞെടുപ്പില് മത്സരിക്കില്ലെന്ന് അദ്ദേഹം സമൂഹമാധ്യമമായ എക്സിലൂടെ അറിയിച്ചു. മുഖ്യമന്ത്രി സ്ഥാനം ഒഴിഞ്ഞ് മാസങ്ങള്ക്കുശേഷമാണ് അദ്ദേഹത്തിന്റെ പ്രഖ്യാപനം.
‘ഇന്നത്തെ രാഷ്ട്രീയം അഴിമതി നിറഞ്ഞതായി മാറിയിരിക്കുന്നു. അതിനാല് 2028ലെ നിയമസഭാ തിരഞ്ഞെടുപ്പില് ഞാന് മത്സരിക്കില്ല. എന്നാല് രാഷ്ട്രീയത്തില് സജീവമായി തന്നെ തുടരും,’ എന്നാണ് സിദ്ധരാമയ്യയുടെ കുറിപ്പ്.
തന്റെ മണ്ഡലത്തിലെ ജനങ്ങള് വീണ്ടും മത്സരിക്കണമെന്ന് ആവശ്യപ്പെടുന്നുണ്ടെങ്കിലും അത്തരമൊരു തീരുമാനം എടുക്കുന്നത് ഉചിതമല്ലെന്നാണ് കരുതുന്നതെന്നും അദ്ദേഹം വ്യക്തമാക്കി. സത്യസന്ധമായ രാഷ്ട്രീയത്തിന് ഇന്നത്തെ സാഹചര്യത്തില് വേണ്ടത്ര ഇടമില്ലെന്ന വിലയിരുത്തലാണ് ഇത്തരമൊരു തീരുമാനത്തിന് പിന്നിലെ പ്രധാന കാരണമെന്നും അദ്ദേഹം പറഞ്ഞു.
പ്രായവും ആരോഗ്യസ്ഥിതിയും തിരഞ്ഞെടുപ്പ് രാഷ്ട്രീയത്തില് നിന്ന് പിന്മാറാനുള്ള മറ്റൊരു കാരണമായി സിദ്ധരാമയ്യ ചൂണ്ടിക്കാട്ടി. അഞ്ച് പതിറ്റാണ്ടിലേറെയായി നീണ്ട രാഷ്ട്രീയ ജീവിതത്തില് കര്ണാടക ജനങ്ങള് നല്കിയ പിന്തുണയ്ക്ക് നന്ദി അറിയിച്ച അദ്ദേഹം, ‘ഈ സംസ്ഥാനത്തെ ജനങ്ങള് എന്നെ അവരില് ഒരാളായി കണ്ട് സ്വീകരിച്ചു. ആ സ്നേഹത്തിനും വിശ്വാസത്തിനും ഞാന് എന്നും കടപ്പെട്ടിരിക്കും,’ എന്നും കുറിച്ചു.
തിരഞ്ഞെടുപ്പ് രാഷ്ട്രീയത്തില് നിന്ന് പിന്മാറുന്നുവെങ്കിലും പൊതുരംഗത്തും രാഷ്ട്രീയ പ്രവര്ത്തനങ്ങളിലും സജീവമായി തുടരുമെന്നും സിദ്ധരാമയ്യ വ്യക്തമാക്കിയിട്ടുണ്ട്. അദ്ദേഹത്തിന്റെ പ്രഖ്യാപനം കര്ണാടക രാഷ്ട്രീയത്തില് വലിയ ചര്ച്ചകള്ക്കാണ് വഴിവെച്ചിരിക്കുന്നത്.
