ന്യൂഡല്ഹി: ഡല്ഹി വനിതാ കമ്മീഷന് അധ്യക്ഷയായി ബിജെപി നേതാവ് ലതാ ഗുപ്തയെ നിയമിച്ചു. ശ്യാം ബാല, മാള്തി വര്മ്മ, ലതാ സിധി, സന്രക്ഷിക ശര്മ്മ ഝ, രേണു ഭല്ല എന്നിവരെ കമ്മീഷന് അംഗങ്ങളായും നിയമിച്ചതായി ഡല്ഹി മുഖ്യമന്ത്രിയുടെ ഓഫീസ് അറിയിച്ചു. മുന് അധ്യക്ഷയായ സ്വാതി മലിവാള് 2024 ജനുവരിയില് രാജ്യസഭാംഗമായി തിരഞ്ഞെടുക്കപ്പെട്ടതിനെ തുടര്ന്ന് രാജിവെച്ച ശേഷമാണ് വനിതാ കമ്മീഷന് അധ്യക്ഷ സ്ഥാനം രണ്ട് വര്ഷത്തിലേറെയായി ഒഴിഞ്ഞുകിടന്നിരുന്നത്. പുതിയ നിയമനത്തോടെ കമ്മീഷന് വീണ്ടും പൂര്ണ നേതൃത്വം ലഭിച്ചിരിക്കുകയാണ്.
സ്ത്രീകളുടെ സുരക്ഷ, അന്തസ്, അവകാശ സംരക്ഷണം, ശാക്തീകരണം എന്നിവ ഉറപ്പാക്കുന്നതില് വനിതാ കമ്മീഷന് നിര്ണായക പങ്കാണ് വഹിക്കുന്നതെന്ന് ഡല്ഹി മുഖ്യമന്ത്രിയുടെ ഓഫീസ് വ്യക്തമാക്കി. നിയമനത്തിന് പിന്നാലെ പ്രതികരിച്ച ലതാ ഗുപ്ത, സ്ത്രീസുരക്ഷയാണ് തന്റെ പ്രധാന പരിഗണനയെന്ന് പറഞ്ഞു. എല്ലാ സ്ത്രീകള്ക്കും ഭയമില്ലാതെ, എളുപ്പത്തില് വനിതാ കമ്മീഷനെ സമീപിക്കാന് കഴിയുന്ന സാഹചര്യം ഉറപ്പാക്കുകയാണ് തന്റെ ആദ്യ ഉത്തരവാദിത്തമെന്നും അവര് വ്യക്തമാക്കി.
നിലവില് ബിജെപിയുടെ ഡല്ഹി യൂണിറ്റിന്റെ വൈസ് പ്രസിഡന്റായ ലതാ ഗുപ്ത, ലക്ഷ്മി നഗര് നിയമസഭാ മണ്ഡലത്തിലെ രണ്ട് വ്യത്യസ്ത വാര്ഡുകളെ പ്രതിനിധീകരിച്ച മുനിസിപ്പല് കൗണ്സിലറായും പ്രവര്ത്തിച്ചിട്ടുണ്ട്. പുതിയ ചുമതലയിലൂടെ ഡല്ഹിയിലെ വനിതാ ക്ഷേമ-സുരക്ഷാ പ്രവര്ത്തനങ്ങള്ക്ക് കൂടുതല് കരുത്ത് പകരാനാകുമെന്ന പ്രതീക്ഷയിലാണ് ഭരണകൂടം.
