ന്യൂഡല്ഹി: കേന്ദ്ര വിദ്യാഭ്യാസ മന്ത്രിയായി മുതിര്ന്ന ബിജെപി നേതാവ് പ്രഹ്ലാദ് ജോഷി ചുമതലയേറ്റു. മുന് വിദ്യാഭ്യാസ മന്ത്രി ധര്മേന്ദ്ര പ്രധാന് രാജിവെച്ചതിനെ തുടര്ന്നാണ് ജോഷിക്ക് വിദ്യാഭ്യാസ മന്ത്രാലയത്തിന്റെ അധിക ചുമതല നല്കിയത്. രാഷ്ട്രപതി ദ്രൗപദി മുര്മു ധര്മേന്ദ്ര പ്രധാന്റെ രാജി അംഗീകരിച്ചതിന് പിന്നാലെയാണ് നിയമനം.
ചുമതലയേറ്റതിന് ശേഷം പ്രധാനമന്ത്രി നരേന്ദ്ര മോദിയോട് പ്രഹ്ലാദ് ജോഷി നന്ദി രേഖപ്പെടുത്തി. ‘കേന്ദ്ര വിദ്യാഭ്യാസ മന്ത്രിയായി ഇന്ന് ചുമതലയേറ്റു. ഈ ഉത്തരവാദിത്വം എന്നില് അര്പ്പിച്ച പ്രധാനമന്ത്രി നരേന്ദ്ര മോദിജിക്ക് ഹൃദയംഗമമായ നന്ദി. വിനയത്തോടെയും ശക്തമായ കടമബോധത്തോടെയും ഈ ഉത്തരവാദിത്വം ഏറ്റെടുക്കുകയാണ്,’ എന്ന് അദ്ദേഹം എക്സില് കുറിച്ചു.
നിലവില് കേന്ദ്ര ഉപഭോക്തൃകാര്യ, ഭക്ഷ്യ-പൊതുവിതരണ മന്ത്രിയും പുതിയ-പുനരുപയോഗ ഊര്ജ മന്ത്രിയുമായ പ്രഹ്ലാദ് ജോഷി, വിദ്യാഭ്യാസ മന്ത്രാലയത്തിന്റെ അധിക ചുമതലയും ഇനി വഹിക്കും. കര്ണാടകയിലെ ധാര്വാഡ് ലോക്സഭാ മണ്ഡലത്തെ പ്രതിനിധീകരിക്കുന്ന അദ്ദേഹം 2004 മുതല് തുടര്ച്ചയായി അഞ്ച് തവണ എംപിയായി തിരഞ്ഞെടുക്കപ്പെട്ടിട്ടുണ്ട്.
ബിജെപിയുടെ കര്ണാടക സംസ്ഥാന അധ്യക്ഷനായും വിവിധ കേന്ദ്ര മന്ത്രാലയങ്ങളുടെ ചുമതല വഹിച്ചും പ്രവര്ത്തിച്ചിട്ടുള്ള ജോഷി, പാര്ലമെന്ററി കാര്യങ്ങള്, കല്ക്കരി, ഖനനം, ഉപഭോക്തൃകാര്യങ്ങള്, ഭക്ഷ്യ-പൊതുവിതരണം, പുതിയ-പുനരുപയോഗ ഊര്ജം തുടങ്ങിയ സുപ്രധാന വകുപ്പുകള്ക്ക് നേതൃത്വം നല്കിയിട്ടുണ്ട്.
റാഷ്ട്രീയ സ്വയംസേവക് സംഘവുമായി (ആര്എസ്എസ്) ചെറുപ്പത്തില് തന്നെ ബന്ധം സ്ഥാപിച്ച ജോഷി പിന്നീട് കര്ണാടകയിലെ സംഘടനാ-രാഷ്ട്രീയ പ്രവര്ത്തനങ്ങളിലൂടെ പൊതുരംഗത്ത് സജീവമായി. 1962 നവംബര് 27ന് കര്ണാടകയിലെ വിജയപുരയിലാണ് ജനനം. ഇന്ത്യന് റെയില്വേ ജീവനക്കാരനായിരുന്ന പിതാവിന്റെ കുടുംബത്തില് വളര്ന്ന അദ്ദേഹം ഹുബ്ബള്ളിയിലെ കെ.എസ്. ആര്ട്സ് കോളേജില് നിന്ന് ബിരുദം നേടി.
