സമൃദ്ധിയുടേയും ഐശ്വര്യത്തിന്റേയും ദിനമാണ് അക്ഷയതൃതിയ. വൈശാഖമാസത്തിലെ ശുക്ലപക്ഷത്തിലെ മൂന്നാമത്തെ തൃതീയയാണ് അക്ഷയതൃതീയയായി കണക്കാക്കുന്നത്. മെയ് മാസം 7-ാം തീയതിയാണ് ഈ വര്ഷത്തെ അക്ഷയതൃതിയ.
ശുഭകാര്യങ്ങള്ക്ക് തുടക്കംകുറുക്കാന് ഉത്തമമായ മാസമാണ് വൈശാഖം. അക്ഷയതൃതീയ നാളില് ചെയ്യുന്ന സദ്കര്മ്മങ്ങളുടെ ഫലം ക്ഷയിക്കില്ല എന്നാണ് പുരാതനകാലം മുതല്ക്കേയുള്ള വിശ്വാസം. സ്വര്ണ്ണം വാങ്ങാന് ഏറ്റവും ഉത്തമം ആയ ദിനം അക്ഷയതൃതിയ ആണെന്നാണ് വിശ്വാസം. അതുകൊണ്ട് തന്നെ അക്ഷയതൃതിയ ദിനത്തില് സ്വര്ണ്ണകടകളില് വന് തിരക്കാണ് അനുഭവപ്പെടുന്നത്.
രാജ്യത്ത് ഏറ്റവും അധികം സ്വര്ണ്ണ വില്പന നടക്കുന്ന ദിവസമാണ് അക്ഷയതൃതിയ. സ്വര്ണ്ണ വില്പനയില് മുന് വര്ഷത്തേക്കാള് 20 മുതല് 30 ശതമാനം വരെ വര്ധനവാണ് ഇത്തവണ വ്യാപാരികള് പ്രതീക്ഷിക്കുന്നത്. മുന് വര്ഷങ്ങളിലെ പോലെ വലിയ വിലക്കയറ്റം ഉണ്ടാവാത്തതിനാല് ഈ വര്ഷം സ്വര്ണ്ണവിപണിയില് റെക്കോര്ഡ് വില്പന നടക്കുമെന്നാണ് ജൂവലറി ഉടമകളുടെ പ്രതീക്ഷ.
അക്ഷയതൃതിയയ്ക്കു മുന്നോടിയായി രാജ്യത്തെ സ്വര്ണ്ണ ഇറക്കുമതിയില് 20% വര്ധനവും ഉണ്ടായിട്ടുണ്ട്. അക്ഷയതൃതിയ പ്രമാണിച്ച് ജൂവലറികള് സ്റ്റോക്ക് വര്ധിപ്പിച്ചതാണ് സ്വര്ണ്ണ ഇറക്കുമതി കൂടാന് കാരണം.
ആഴ്ച്ചകള്ക്കു മുന്പേ തന്നെ സ്വര്ണ്ണ ബുക്കിംഗും ജൂവലറി ഉടമകള് ആരംഭിച്ചു കഴിഞ്ഞു. കഴിഞ്ഞ ദിവസങ്ങളില് സ്വര്ണ്ണ വിലയില് രേഖപ്പെടുത്തിയ കുറവ് ഉപഭോക്താക്കളെ വലിയ രീതിയില് സ്വാധീനിക്കുമെന്നാണ് വിദഗ്ധരുടെ അഭിപ്രായം.
സ്വര്ണ്ണം ഗ്രാമിന് 2,955 രൂപയും പവന് 23,640 രൂപയുമാണ് ഇന്നത്തെ നിരക്ക്.
