കണ്ണൂർ: മിഠായിക്കടലാസിൽ പൊതിഞ്ഞ ചെറിയ പാക്കറ്റുകൾ.പുറമേ കണ്ടാൽ സാധാരണ മിഠായി. എന്നാൽ തുറന്നപ്പോൾ പുറത്തുവന്നത് ലക്ഷങ്ങൾ വിലമതിക്കുന്ന എംഡിഎംഎ. തലശ്ശേരിയിൽ പൊലീസ് നടത്തിയ മിന്നൽ ഓപ്പറേഷനിൽ 185 ഗ്രാം എംഡിഎംഎയുമായി മുഹമ്മദ് സമീൽ പിടിയിലായി.
ലഹരിമരുന്ന് വിൽപ്പനയ്ക്കായി ഓരോ പാക്കറ്റും പ്രത്യേകം മിഠായിക്കടലാസിൽ പൊതിഞ്ഞ് സൂക്ഷിച്ച നിലയിലായിരുന്നു. അറസ്റ്റ് ചെയ്ത പ്രതിയുടെ വീട്ടിൽ നടത്തിയ വിശദ പരിശോധനയിലാണ് അന്വേഷണസംഘത്തെ വീണ്ടും ഞെട്ടിച്ച കണ്ടെത്തൽ ഉണ്ടായത്. എയർകൂളറിനുള്ളിൽ ഒളിപ്പിച്ചുവെച്ച നിലയിലും കൂടുതൽ എംഡിഎംഎ കണ്ടെത്തി.
രഹസ്യവിവരത്തിന്റെ അടിസ്ഥാനത്തിൽ നടത്തിയ കൃത്യമായ നീക്കമാണ് വൻ ലഹരി ശൃംഖലയിലെ പ്രധാന കണ്ണിയെ വലയിലാക്കാൻ പൊലീസിനെ സഹായിച്ചത്. പിടിച്ചെടുത്ത മയക്കുമരുന്നിന് വിപണിയിൽ ലക്ഷക്കണക്കിന് രൂപ വില വരുമെന്നാണ് പ്രാഥമിക വിലയിരുത്തൽ.
പ്രതിക്ക് ലഹരിമരുന്ന് എത്തിച്ചവരും ഇത് വാങ്ങാൻ എത്തിയവരും ആരൊക്കെയാണെന്നതടക്കമുള്ള വിവരങ്ങൾ കേന്ദ്രീകരിച്ച് അന്വേഷണം വ്യാപിപ്പിച്ചിട്ടുണ്ട്. പ്രതിയെ കോടതിയിൽ ഹാജരാക്കുമെന്ന് പൊലീസ് അറിയിച്ചു.
