ഭുവനേശ്വർ: ഒഡിഷയിൽ നവീൻ പട്നായിക് ബിജെഡി നിയമസഭാ കക്ഷി നേതാവായി തിരഞ്ഞെടുക്കപ്പെട്ടു. തുടർച്ചയായ അഞ്ചാം തവണയും മുഖ്യമന്ത്രിയാകാനുള്ള ഭൂരിപക്ഷം ലഭിച്ച അദ്ദേഹം ഗവർണ്ണർ പ്രൊഫസ്സർ ഗണേശി ലാലിനെ കണ്ട് മന്ത്രിസഭാ രൂപീകരണത്തിനുള്ള അവകാശവാദം ഉന്നയിച്ചു.
തിരഞ്ഞെടുക്കപ്പെട്ട ബിജെഡി എം എൽ എമാർ തലസ്ഥാനത്ത് യോഗം ചേർന്ന് പട്നായിക്കിനെ നിയമസഭാ കക്ഷി നേതാവായി ഐകകണ്ഠേന തിരഞ്ഞെടുത്തതിന് ശേഷമായിരുന്നു അദ്ദേഹം ഗവർണ്ണറെ കണ്ടത്.
നിയമസഭാ കക്ഷി നേതാവായി തന്നെ തിരഞ്ഞെടുത്തതിന് അദ്ദേഹം സാമാജികരോട് നന്ദി അറിയിച്ചു. ഒഡിഷയുടെ ആവശ്യങ്ങളുമായി ശക്തമായി മുന്നോട്ട് പോകാനും ജനങ്ങൾക്ക് വേണ്ടി കഠിനാദ്ധ്വാനം ചെയ്യാനും അദ്ദേഹം തിരഞ്ഞെടുക്കപ്പെട്ട ബിജെഡി എം പിമാരോട് ആഹ്വാനം ചെയ്തു.
കഴിഞ്ഞ ലോക്സഭാ തിരഞ്ഞെടുപ്പിൽ ബിജെപിയും ബിജെഡിയും ഒഡിഷയിൽ മികച്ച പ്രകടനം കാഴ്ച വെച്ചിരുന്നു.
147 നിയമസഭാ സീറ്റുകളിലേക്കും 21 ലോക്സഭാ സീറ്റുകളിലേക്കും ഒരുമിച്ചായിരുന്നു ഒഡിഷയിൽ തിരഞ്ഞെടുപ്പ് നടന്നത്.