ഗാംഗ്ടോക്ക്: സിക്കിമിലെ നാംചി ജില്ലയിൽ എൻഎച്ച്പിസിയുടെ നിർമ്മാണത്തിലിരുന്ന തുരങ്കം തകർന്നുണ്ടായ ദുരന്തത്തിൽ 20 തൊഴിലാളികൾ മരിച്ചതായി അധികൃതർ സ്ഥിരീകരിച്ചു. അഞ്ച് പേർ ഇപ്പോഴും തുരങ്കത്തിനുള്ളിൽ കുടുങ്ങിക്കിടക്കുന്നതായി റിപ്പോർട്ടുണ്ട്. വിവിധ ഏജൻസികളുടെ നേതൃത്വത്തിൽ രക്ഷാപ്രവർത്തനം തുടരുകയാണ്.
തിങ്കളാഴ്ച ഉച്ചയോടെയാണ് ടീസ്ത സ്റ്റേജ്-VI ജലവൈദ്യുത പദ്ധതിയുടെ ഭാഗമായി നിർമ്മാണത്തിലിരുന്ന തുരങ്കത്തിൽ അപകടമുണ്ടായത്. പ്രോജക്ട് ഓഫീസർമാർ ഉൾപ്പെടെ 25 തൊഴിലാളികളാണ് തുരങ്കത്തിനുള്ളിൽ കുടുങ്ങിയത്.
പാറകൾക്കടിയിൽ കുടുങ്ങിക്കിടന്ന മീഥെയ്ൻ വാതകം പുറത്തുവന്ന് സ്ഫോടനമുണ്ടായതിനെ തുടർന്നാണ് തുരങ്കം തകർന്നതെന്നാണ് എൻഎച്ച്പിസിയുടെ പ്രാഥമിക വിശദീകരണം. ഇതോടെ കനത്ത പുകയും വിഷവാതകവും തുരങ്കത്തിനുള്ളിൽ വ്യാപിച്ചതായും അധികൃതർ അറിയിച്ചു.
ഇതിനകം 12 മൃതദേഹങ്ങൾ പുറത്തെടുത്തിട്ടുണ്ട്. ഇതിൽ ഏഴ് പേരെ തിരിച്ചറിഞ്ഞതായും ബാക്കിയുള്ളവരുടെ വിവരങ്ങൾ സ്ഥിരീകരിക്കാനുള്ള നടപടികൾ പുരോഗമിക്കുകയാണെന്നും നാംചി പോലീസ് അറിയിച്ചു.
ദുരന്തത്തിൽ മരിച്ചവരുടെ കുടുംബങ്ങൾക്ക് നാല് ലക്ഷം രൂപയും, പരിക്കേറ്റവർക്ക് 50,000 രൂപയും ധനസഹായമായി നൽകുമെന്ന് സിക്കിം മുഖ്യമന്ത്രി പ്രേം സിംഗ് തമാംഗ് പ്രഖ്യാപിച്ചു. മീഥെയ്ൻ വാതക ചോർച്ചയുടെ യഥാർത്ഥ കാരണം അന്വേഷിക്കാൻ പ്രത്യേക സമിതിയെ നിയോഗിക്കുമെന്നും അദ്ദേഹം അറിയിച്ചു.
പശ്ചിമ ബംഗാളിൽ നിന്നുള്ള പ്രത്യേക മൈനിംഗ് റെസ്ക്യൂ സംഘമുൾപ്പെടെ വിവിധ ഏജൻസികൾ രക്ഷാപ്രവർത്തനത്തിൽ പങ്കെടുക്കുന്നുണ്ട്.
