ഒരിടവേളയ്ക്ക് ശേഷം ഈസ്റ്റ് കോസ്റ്റ് വിജയന് സംവിധാനം ചെയ്യുന്ന ചിത്രം ‘ചില ന്യൂജെന് നാട്ടുവിശേഷങ്ങളു’ടെ മ്യൂസിക്, ട്രെയിലര് ലോഞ്ച് കൊച്ചിയില് നടന്നു. കലൂര് ഐഎംഎ ഹാളില് നടന്ന വര്ണാഭമായ ചടങ്ങില് ജനപ്രിയ നടന് ദിലീപ് ആണ് ഓഡിയോ-ട്രെയിലര് പ്രകാശനം നിര്വഹിച്ചത്.
ദിലീപിനൊപ്പം സംവിധായകന് ഈസ്റ്റ് കോസ്റ്റ് വിജയന്, ഗായകന് പി.ജയചന്ദ്രന്, സംഗീത സംവിധയകന് എം.ജയചന്ദ്രന്, ഗാനരചയിതാവ് സന്തോഷ് വര്മ്മ, ഹരീഷ് കണാരന്, ചിത്രത്തിലെ താരങ്ങളായ അഖില് പ്രഭാകര്, ശിവകാമി, സോനു, ക്യാമറാമന് അനില് തുടങ്ങിയവര് ചേര്ന്ന് ഭദ്രപീപം കൊളുത്തിയ ശേഷമാണ് ഓഡിയോ പ്രകാശനം നിവഹിച്ചത്. സിനിമ-സീരിയല്-രാഷ്ട്രീയ-സാംസ്കാരിക രംഗത്തെ പ്രമുഖരുടെ സാന്നിധ്യത്തിലായിരുന്നു ചടങ്ങ്.
ചടങ്ങിനിടെ ചിത്രത്തിലെ അഞ്ച് ഗാനങ്ങളും ട്രെയിലറും അതിഥികള്ക്കായി പ്രദര്ശിപ്പിച്ചു. എം. ജയചന്ദ്രന് ഈണമിട്ട അഞ്ച് ഗാനങ്ങളാണ് ചിത്രത്തില് ഉള്ളത്. മൂന്ന് ഗാനങ്ങളുടെ രചന സന്തോഷ് വര്മയും രണ്ട് ഗാനങ്ങളുടെ വരികള് ഈസ്റ്റ് കോസ്റ്റ് വിജയന്റേതുമാണ്. ചിത്രത്തിലെ ഗാനങ്ങള് ആലപിച്ചിരിക്കുന്നത് ഗാനഗന്ധര്വ്വന്, യേശുദാസ്, ശങ്കര് മഹാദേവന്, പി. ജയചന്ദ്രന്, എം.ജി ശ്രീകുമാര്, ശ്രേയാ ഘോഷാല് എന്നിവരാണ്.
പ്രമുഖ ഹാസ്യ താരം സുരാജ് വെഞ്ഞാറമൂട്, ഹരീഷ് കണാരന് തുടങ്ങിയവര് കേന്ദ്രകഥാപാത്രങ്ങളാകുന്ന ചിത്രത്തില് പുതുമുഖതാരം അഖില്പ്രഭാകറാണ് നായകന്. ശിവകാമി, സോനു എന്നിവരാണ് ചിത്രത്തിലെ നായികമാര്. നെടുമുടി വേണു, ദിനേശ് പണിക്കര്, വിനയ് വിജയന്, ജയകൃഷ്ണന്, നോബി, ബിജുക്കുട്ടന്, വിഷ്ണുപ്രിയ, സുബി സുരേഷ്, അഞ്ജലി തുടങ്ങി ഒരു മികച്ച താരനിരയും ചിത്രത്തില് അണിനിരക്കുന്നുണ്ട്.
പ്രണയവും ഹാസ്യവും ഇഴചേര്ന്ന ചിത്രത്തിന്റെ തിരക്കഥ ഒരുക്കുന്നത് എസ്.എല് പുരം ജയസൂര്യയാണ്. പ്രണയം, വിവാഹം തുടങ്ങിയ കാര്യങ്ങളിലൂടെ മുന്നോട്ടു പോകുന്ന രസകരമായ നിമിഷങ്ങളിലൂടെ കടന്നുപോകുന്ന ചിത്രത്തിന്റെ ഛായാഗ്രഹണം അനില് നായര് നിവഹിക്കുന്നു.
പത്ത് വര്ഷത്തെ ഇടവേളയ്ക്ക് ശേഷം ഈസ്റ്റ് കോസ്റ്റും സംഗീത സംവിധായകന് എം. ജയചന്ദ്രനും ഒന്നിക്കുന്ന ചിത്രമെന്ന പ്രത്യേകതയും ചില ന്യുജെന് നാട്ടുവിശേഷങ്ങള്ക്കുണ്ട്. ചിത്രം ജൂലൈ പകുതിയോടെ തിയേറ്ററുകളിലെത്തും.