കൊച്ചി: പ്രളയദുരിതമനുഭവിക്കുന്നവര്ക്ക് സഹായമെത്തിക്കുന്നതില് കേരളം ഒരുമിച്ച് നില്ക്കുകയാണ്. പ്രളയക്കെടുതിയില് വലയുന്ന വയനാട് തിരുനെല്ലിയിലെ ജനങ്ങള്ക്ക് ഒരു ലോറി നിറയെ അവശ്യ സാധനങ്ങള് നല്കി നടന് പൃഥ്വിരാജ് സുകുമാരന്. പ്രളയ ദുരിതാശ്വാസ പ്രവര്ത്തനങ്ങള് നടത്തുന്ന കൊച്ചിയിലെ ദുരിതാശ്വാസ കൂട്ടായ്മയായ അന്പോട് കൊച്ചിക്ക് വേണ്ടിയാണ് പൃഥ്വി സാധനങ്ങള് അയച്ചത്. തിരുനെല്ലി ഗ്രാമ പഞ്ചായത് പ്രസിഡന്റിന്റെ പേരിലാണ് സാധനങ്ങള് കൊടുത്തയച്ചത്.
അന്പോട് കൊച്ചിയിലെ സജീവ പ്രവര്ത്തകനും നടനുമായ ഇന്ദ്രജിത്താണ് അനുജന്റെ മഹത്തായ പ്രവര്ത്തി ആരാധകരുമായി പങ്കുവച്ചത്.
‘ഇന്ന് വരെയുള്ളതില് വച്ച് ഞങ്ങളുടെ ഏറ്റവും വലിയ സിംഗിള് കണ്സൈന്മെന്റ് …വയനാട്ടിലേക്കുള്ള ഒരു ട്രക്ക് നിറയെ അവശ്യസാധനങ്ങള്ക്ക് നന്ദി രാജു… തിരുനെല്ലി ഗ്രാമപഞ്ചായത്തിലേക്ക് ട്രക്ക് നമ്പര് 26. എന്നാണ് ഇന്ദ്രജിത്ത് സോഷ്യല് മീഡിയയില് കുറിച്ചത്.
ഇന്ദ്രജിത്ത്, പൂര്ണിമ, സരയൂ, ടോവിനോ തോമസ്, ജയസൂര്യ തുടങ്ങിയവര് അന്പോട് കൊച്ചിയില് സജീവമായ പ്രവര്ത്തകരാണ്.
