ലണ്ടന്: ഇംഗ്ലണ്ടിന്റെ പേസ് താരം ജൊഫ്രാ ആര്ച്ചര് ആഞ്ഞടിച്ചതോടെ ഓസീസിന് ബാറ്റിംഗ് തകര്ച്ച. ആദ്യ ഇന്നിംഗ്സില് ഇംഗ്ലണ്ടിന്റെ 258 എന്ന ചെറിയ സ്ക്കോറിനെതിരെ മഴമൂലം കളി നിര്ത്തുമ്പോള് ഓസീസ് 4 വിക്കറ്റ് നഷ്ടത്തില് വെറും 80 റണ്സ് എന്ന നിലയില് തകര്ച്ചയിലാണ്. 13 ഓവറില് വെറും 18 റണ്സ് മാത്രം വിട്ടുകൊടുത്തുകൊണ്ട് ഓപ്പണര് ബ്രാന്റ്ക്രോഫ്റ്റിന്റെ വിക്കറ്റ വീഴ്ത്തിക്കൊണ്ടാണ് ആര്ച്ചര് അരങ്ങേറ്റം ഗംഭീരമാക്കിയത്.
ആര്ച്ചറുടെ 13 ല് 6 ഓവറുകളും മെയ്ഡനായിരുന്നു. ഈ സമ്മര്ദ്ദത്തിനിടെ പരിചയ സമ്പന്നനായ ബ്രോഡ് 13 ഓവറില് 26 ന് 2 വിക്കറ്റ് വീഴ്ത്തിയപ്പോള് സ്റ്റാക്സും ഓരോ വിക്കറ്റ് വീഴ്ത്തി. ഓസീസിന്റെ ഓപ്പണര്മാരായ ബ്രാന് ക്രോഫ്റ്റ്(13), വാര്ണര്(3), ഖ്വാജ(36), ഹേഡ്(7) എന്നിവര് പവലിയനിലെത്തിക്കഴിഞ്ഞു.
കഴിഞ്ഞ ലോകകപ്പിലെ മികച്ച പ്രകടനത്തിനുശേഷമാണ് ആര്ച്ചര് ടെസ്റ്റ് ക്രിക്കറ്റിലെ തന്റെ അരങ്ങേറ്റം നടത്തിയത്. മഴ കളിക്കുന്ന ടെസ്റ്റില് ആദ്യദിനം ഒലിച്ചുപോയപ്പോള് രണ്ടാം ദിനത്തില് ആതിഥേയര് ഓള് ഔട്ടായി. മൂന്നാം ദിനത്തില് ഓസീസ് തകര്ന്നതോടെ രണ്ടാം ടെസ്റ്റ് വിരസതയിലേയ്ക്കാണ് നീങ്ങുന്നത്.
ആദ്യ ടെസ്റ്റില് സെഞ്ച്വറി പ്രളയം തീര്ത്ത് ഇംഗ്ലീഷ് ആക്രമണത്തെ ശക്തമായി നേരിട്ട സ്മിത്തും വേഡും ക്രിസിലുള്ളതാണ് ഓസീസിനാശ്വാസം.
5 ടെസ്റ്റുകളടങ്ങുന്ന ചിരവൈരികളുടെ പോരാട്ടത്തിലെ ആദ്യടെസ്റ്റ് നേടിയ ആത്മവിശ്വാസത്തിലാണ് ഓസ്ട്രേലിയ.