പാലക്കാട്: അട്ടപ്പാടി മല്ലീശ്വര വിദ്യാനികേതനിലെ കുട്ടികളുടെ സ്വപ്നങ്ങൾക്ക് ചിറകേകാൻ ഇന്ത്യൻ നാവികസേനയുടെ മുൻ മേധാവി അഡ്മിറൽ ആർ. ഹരികുമാറും ഭാര്യ കലാ ഹരികുമാറും വിദ്യാലയം സന്ദർശിച്ചു. വിദ്യാലയത്തിലെ മുഴുവൻ വിദ്യാർത്ഥികൾക്കുമായി പഠനോപകരണങ്ങളും നോട്ടുപുസ്തകങ്ങളും അടങ്ങിയ സമ്മാനക്കിറ്റുകൾ വിതരണം ചെയ്തുകൊണ്ടായിരുന്നു അദ്ദേഹത്തിന്റെ സ്നേഹസന്ദർശനം.
വനവാസി മേഖലയിലെ കുട്ടികൾക്ക് ഗുണമേന്മയുള്ള വിദ്യാഭ്യാസം നൽകുന്ന മല്ലീശ്വര വിദ്യാനികേതന്റെ പ്രവർത്തനങ്ങളെക്കുറിച്ച് അറിഞ്ഞാണ് അദ്ദേഹം വിദ്യാലയത്തിലെത്തിയത്. കുട്ടികളുമായി ഏറെ നേരം ചെലവഴിച്ച അദ്ദേഹം, അവരുടെ കലാപരിപാടികൾ ആസ്വദിക്കുകയും സംശയങ്ങൾക്ക് മറുപടി നൽകുകയും ജീവിതാനുഭവങ്ങൾ പങ്കുവെക്കുകയും ചെയ്തു.
വിദ്യാലയത്തിലെ റെഡ് ക്രോസ് യൂണിറ്റിന്റെ ഗാർഡ് ഓഫ് ഹോണറോടെയായിരുന്നു വിശിഷ്ടാതിഥികളെ സ്വീകരിച്ചത്. വിദ്യാർത്ഥികളുടെ ആകർഷകമായ യോഗ പ്രദർശനവും വിവിധ കലാപരിപാടികളും ചടങ്ങിന് മാറ്റുകൂട്ടി. വിദ്യാലയത്തിലെ സ്പീക്കേഴ്സ് ക്ലബ്ബിന്റെ ഉദ്ഘാടനവും അഡ്മിറൽ ആർ. ഹരികുമാർ നിർവ്വഹിച്ചു. ചടങ്ങിൽ പ്രധാനാധ്യാപകൻ ഷാജി.എ, അഡ്മിറൽ ആർ. ഹരികുമാറിനെ ആദരിച്ചു.
