ലോര്ഡ്സ്: ആഷസ് പരമ്പരയിലെ ആവേശകരമായ രണ്ടാം ടെസ്റ്റ് സമനിലയില് പിരിഞ്ഞു. ജയപരാജയങ്ങള് മാറി മറിഞ്ഞ മത്സരത്തിനൊടുവില് ആതിഥേയര്ക്കു മുന്നില് ഓസ്ട്രേലിയ ചെറുത്തു നിന്നു. ബെന് സ്റ്റോക്സ് നേടിയ സെഞ്ച്വറിയുടെ മികവില് ഇംഗ്ലണ്ട് പടുത്തുയര്ത്തിയ 267 റണ്സ് വിജയലക്ഷ്യം പിന്തുടര്ന്ന ഓസീസ് മത്സരം അവസാനിക്കുമ്പോള് 6 വിക്കറ്റ് നഷ്ടത്തില് 154 റണ്സ് എന്ന നിലയിലായിരുന്നു.
സ്കോര്: ഇംഗ്ലണ്ട് 258 & 258/5 ഡിക്ലയേര്ഡ്, ഓസ്ട്രേലിയ 250 & 154/6 (47.3)
നേരത്തെ, രണ്ടാം ഇന്നിംഗ്സില് ഇംഗ്ലണ്ട് 5 വിക്കറ്റ് നഷ്ടത്തില് 258 റണ്സിന് ഡിക്ലയര് ചെയ്തിരുന്നു. 165 പന്തില് 115 റണ്സ് നേടി പുറത്താകാതെ നിന്ന ബെന് സ്റ്റോക്സിന്റെ പ്രകടനമാണ് ഇംഗ്ലണ്ടിന് മികച്ച സ്കോര് സമ്മാനിച്ചത്. റോറി ബേണ്സ്(29), ജോ ഡെന്ലി(26), ജോസ് ബട്ട്ലര്(31), ജോണി ബെയര്സ്റ്റോ(30*) എന്നിവരുടെ പ്രകടനവും നിര്ണ്ണായകമായി.
ഓസീസിന് വേണ്ടി പാറ്റ് കമ്മിന്സ് 3 വിക്കറ്റും പീറ്റര് സിഡില് രണ്ട് വിക്കറ്റും വീഴ്ത്തി.
രണ്ടാം ഇന്നിംഗ്സില് 267 റണ്സ് വിജയലക്ഷ്യവുമായി ബാറ്റിംഗ് ആരംഭിച്ച ഓസ്ട്രേലിയക്ക് കാമെറൂണ് ബന്ക്രോഫ്റ്റ്(16), ഡേവിഡ് വാര്ണ്ണര്(5), ഉസ്മാന് ഖവാജ(2) എന്നിവരുടെ വിക്കറ്റുകള് തുടക്കത്തിലേ നഷ്ടമായി. തുടര്ന്ന് പരിക്കേറ്റ സ്മിത്തിന് പകരക്കാരനായെത്തിയ മാര്നസ് ലബുഷെയ്ന്(59) ട്രാവിസ് ഹെഡിനെ ഒപ്പം ചേര്ത്ത് പൊരുതി നേടിയ അര്ദ്ധ സെഞ്ച്വറി ഓസീസിന് പ്രതീക്ഷ നല്കി. എന്നാല് ലബുഷെയ്ന് പുറത്തായതോടെ ഓസീസ് സമ്മര്ദ്ദത്തിലായി. മാത്യു വെയ്ഡ്(1), ടിം പെയ്ന്(4) എന്നിവര് നിലയുറപ്പിക്കാനാകാതെ മടങ്ങിയപ്പോള് ഇംഗ്ലണ്ട് പ്രതീക്ഷയിലായി. എന്നാല് പിന്നീടുള്ള ഓവറുകളില് പിടിച്ച് നിന്ന ഓസീസ് മത്സരം സമനിലയിലാക്കി.
ജോഫ്ര ആര്ച്ചര്, ജാക്ക് ലീച്ച് എന്നിവര് 3 വിക്കറ്റ് വീതം സ്വന്തമാക്കി. ഇതോടെ ആദ്യ ടെസ്റ്റ് വിജയിച്ച ഓസീസ് പരമ്പരയില് 1-0ന് മുന്നിലാണ്.