വിന്‍ഡീസിനെതിരായ ടെസ്റ്റ് പരമ്പരയ്‌ക്ക് മുന്നോടിയായി നടന്ന സന്നാഹ മത്സരത്തില്‍ വെസ്റ്റ് ഇന്‍ഡീസ് എ ടീമുമായുള്ള ഇന്ത്യയുടെ മത്സരം സമനിലയില്‍ അവസാനിച്ചു.
നിര്‍ണായക ഘട്ടത്തില്‍ തിളങ്ങിയ ഇന്ത്യന്‍ ഉപനായകന്‍ അജിങ്ക്യ രഹാനെയെയുടെയും ഹനുമ വിഹാരിയുടെയും ബാറ്റിങ് പ്രകടനമാണ് ഇന്ത്യക്ക് മികച്ച സ്‌കോര്‍ സമ്മാനിച്ചത്. വിരാട് കോഹ് ലിയുടെ അഭാവത്തില്‍ ഇന്ത്യയെ നയിക്കുന്നത് രഹാനയാണ്.
രഹാനെ ആദ്യ ഇന്നിങ്‌സില്‍ പരാജയപ്പെട്ടിരുന്നു. എന്നാല്‍ രണ്ടാം ഇന്നിങ്‌സില്‍ ക്രീസില്‍ നിലയുറപ്പിച്ച് കളിച്ച അജിങ്ക്യ രഹാനെ 162 പന്തില്‍ നിന്നും 54 റണ്‍സെടുത്ത് പുറത്താവുകയായിരുന്നു. മൂന്നാമനായി ഇറങ്ങിയ ഹനുമ വിഹാരിയും അര്‍ധ സെഞ്ച്വറി തികച്ചു. 125 പന്തില്‍ നിന്ന് 54 റണ്‍സ് സ്വന്തമാക്കി.
നേരത്തെ, ചേതേശ്വര്‍ പൂജാരയുടെ സെഞ്ചുറിയുടെയും രോഹിത് ശര്‍മ്മയുടെ അര്‍ധസെഞ്ചുറിയുടെയും മികവില്‍ ആദ്യ ഇന്നിങ്‌സില്‍ ഇന്ത്യ 297 റണ്‍സ് സ്വന്തമാക്കിയിരുന്നു. മറുപടി ബാറ്റിങ്ങില്‍ വിന്‍ഡീസ് ഇന്നിങ്‌സ് 181 റണ്‍സില്‍ അവസാനിച്ചു. 116 റണ്‍സിന്റെ ലീഡുമായി രണ്ടാം ഇന്നിങ്‌സ് ആരംഭിച്ച ഇന്ത്യ 188 റണ്‍സില്‍ ഡിക്ലയര്‍ ചെയ്തു.
ഓഗസ്റ്റ് 22-നാണ് ഇന്ത്യയുടെ വിന്‍ഡീസ് പര്യടനത്തിലെ ആദ്യ ടെസ്റ്റ് മത്സരം. ഇതോടെ ഇന്ത്യയുടെ ലോക ടെസ്റ്റ് ചാമ്പ്യന്‍ഷിപ്പ് മത്സരങ്ങള്‍ക്കും തുടക്കമാകും. നേരത്തെ ഏകദിന ടി20 മത്സരങ്ങള്‍ സ്വന്തമാക്കിയ ഇന്ത്യ കരീബിയന്‍ മണ്ണിലെ പൂര്‍ണ ആധിപത്യമാണ് ലക്ഷ്യമിടുന്നത്.
