ഇംഗ്ലണ്ട്: ആഷസ് മൂന്നാം ടെസ്റ്റില്‍ ഓസ്‌ട്രേലിയ- ഇംഗ്ലണ്ട് കളിയില്‍ ഇംഗ്ലണ്ട് തോല്‍ക്കുമെന്നാണ് കട്ട ഇംഗ്ലണ്ട് ഫാന്‍സുകാര്‍ പോലും കരുതിയത്. എന്നാല്‍ കാണികളെ എല്ലാവരെയും അതിശയിപ്പിച്ചു കൊണ്ടുള്ള അവിശ്വസനീയ ജയമായിരുന്നു ഇംഗ്ലണ്ടിന്റേത്.
359 റണ്‍സ് വിജയലക്ഷ്യമായി കളിക്കളത്തില്‍ ഇറങ്ങിയ ഇംഗ്ലണ്ട് ഒരു വിക്കറ്റ് ശേഷിക്കെയാണ് ജയം ഉറപ്പിച്ചത്. എട്ടാം ടെസ്റ്റ് സെഞ്ചുറിയുമായി സ്‌റ്റോക്‌സ് നടത്തിയ പോരാട്ടമാണ് ഇംഗ്ലണ്ടിനെ വിജയത്തിലെത്തിച്ചത്. സെഞ്ചുറി നേടി പുറത്താകാതെ നിന്ന ബെന്‍ സ്‌റ്റോക്‌സ് അവസാന വിക്കറ്റില്‍ കൂട്ടിച്ചേര്‍ത്തത് 75 റണ്‍സാണ്. 219 പന്തില്‍ 11 ബൗണ്ടറിയും എട്ടു സിക്‌സും സഹിതം 135 റണ്‍സുമായി സ്‌റ്റോക്‌സ് പുറത്താകാതെ നിന്നു.
സ്‌കോര്‍: ഓസ്‌ട്രേലിയ 179 & 246, ഇംഗ്ലണ്ട്- 67, 362/ 9
359 റണ്‍സ് വിജയലക്ഷ്യവുമായി ഇറങ്ങിയ ഇംഗ്ലണ്ടിന് 286 റണ്‍സെടുത്തപ്പോഴേയ്‌ക്കും ഒന്‍പതു വിക്കറ്റ് നഷ്ടപ്പെട്ടിരുന്നു. ഇംഗ്ലണ്ടിന് ജയിക്കാന്‍ 73 റണ്‍സ് വേണമായിരുന്നു. ഒരു വിക്കറ്റ് മാത്രം അവശേഷിക്കേ ഇംഗ്ലണ്ട് തോറ്റുപോകുമെന്ന് എല്ലാവരും ഉറപ്പിച്ചിടത്താണ് സ്‌റ്റോക്‌സിന്റെ മിന്നും പ്രകടനം. ജാക്ക് ലീച്ചും ഒപ്പത്തിനൊപ്പം നിന്നതോടെ 126.4 ഓവറില്‍ ഇംഗ്ലണ്ട് വിജയം കൈപിടിയിലൊതുക്കി. 62 പന്തില്‍ 76 റണ്‍സാണ് സ്‌റ്റോക്‌സ്-ജാക്ക് ലീച്ച് കൂട്ടുകെട്ട് നേടിയെടുത്തത്.
