കൊച്ചി: വൻ അളവിൽ എംഡിഎംഎയുമായി ബോഡി ബിൽഡറെ പൊലീസ് പിടികൂടി. എറണാകുളം എടത്തല സ്വദേശി മുഹമ്മദ് സാദിഖ് ആണ് അറസ്റ്റിലായത്. ഇയാളിൽ നിന്ന് 391 ഗ്രാം എംഡിഎംഎ പൊലീസ് പിടിച്ചെടുത്തു.
സംസ്ഥാന വ്യാപക ലഹരിവിരുദ്ധ നടപടിയായ ‘ഓപ്പറേഷൻ തൂഫാൻ’ന്റെ ഭാഗമായി നടത്തിയ പരിശോധനയിലാണ് പ്രതി കുടുങ്ങിയത്. ഡാൻസാഫ് സംഘത്തിന് നേരത്തേ ലഭിച്ച രഹസ്യവിവരത്തിന്റെ അടിസ്ഥാനത്തിൽ മുഹമ്മദ് സാദിഖിനെ നിരീക്ഷിച്ചുവരികയായിരുന്നു.
കഴിഞ്ഞ ദിവസം ലഭിച്ച രഹസ്യവിവരത്തെ തുടർന്ന് നടത്തിയ പരിശോധനയിലാണ് വൻ അളവിൽ എംഡിഎംഎ പിടിച്ചെടുത്തത്. കഴിഞ്ഞ ഒരാഴ്ചയ്ക്കിടെ ഇയാളുടെ ബാങ്ക് അക്കൗണ്ടിലൂടെ 10 ലക്ഷം രൂപയുടെ ഇടപാടുകൾ നടന്നതായും പൊലീസ് കണ്ടെത്തി. ഈ ഇടപാടുകൾ ലഹരിവ്യാപാരവുമായി ബന്ധപ്പെട്ടതാണെന്നാണ് അന്വേഷണ സംഘത്തിന്റെ പ്രാഥമിക നിഗമനം.
ലഹരിക്കടത്ത് കേസുകളിലെ പ്രതിയായ കെവിന്റെ സുഹൃത്താണ് മുഹമ്മദ് സാദിഖെന്നും, കൊച്ചിയിലെ ലഹരി പാർട്ടികളിൽ ഇയാളുടെ സാന്നിധ്യമുണ്ടായിരുന്നുവെന്ന വിവരവും പൊലീസിന് ലഭിച്ചിട്ടുണ്ട്. സംഭവവുമായി ബന്ധപ്പെട്ട് ഇയാളുടെ കൂട്ടാളികളെയും സാമ്പത്തിക ഇടപാടുകളെയും കുറിച്ച് വിശദമായ അന്വേഷണം തുടരുകയാണ്.
