ന്യൂഡല്ഹി: വിരമിക്കലിനെ കുറിച്ചുള്ള ചര്ച്ചകള് പുരോഗമിക്കുന്നതിനിടെ ധോണിയുടെ തിരിച്ചു വരവിനെ കുറിച്ചുള്ള വാര്ത്തകളും ചര്ച്ചയാവുകയാണ്. നിലവില് ധോണി തിരിച്ചു വരവിനെ കുറിച്ച് ആലോചിക്കുന്നില്ലെന്നും അവധി നീണ്ടേക്കുമെന്നാണ് സൂചന.
ലോകകപ്പിനു ശേഷം വിമര്ശനങ്ങളേറ്റു വാങ്ങിയ ധോണി സൈനീക സേവനത്തിനായാണ് അവധിയെടുത്തത്. ഈ വര്ഷം നവംബര് വരെ ടീമിലേക്ക് വരില്ലെന്നാണ് ദേശീയ മാധ്യമങ്ങള് വ്യക്തമാക്കുന്നത്. അങ്ങനെയാണെങ്കില് വിജയ് ഹസാരെ ട്രോഫി, ബംഗ്ലാദേശിനെതിരായ ട്വന്റി20യിലും ധോണി കളിച്ചേക്കില്ലെന്നും സൂചനയുണ്ട്.
ധോണി സ്വയം വിരമിക്കണമെന്നാവശ്യപ്പെട്ട് മുന് ഇന്ത്യന് ക്രിക്കറ്റ് താരം സുനില് ഗവാസ്ക്കറും രംഗത്തെത്തിയിരുന്നു. ധോണിയുടെ തീരുമാനം എന്താണെന്ന് ആര്ക്കും അറിയില്ല. എന്നാല് ധോണിയില്ലാത്ത ഒരു ഇന്ത്യന് ക്രിക്കറ്റ് ടീമിനെ കുറിച്ച് ചിന്തിക്കണമെന്നും അദ്ദേഹത്തിന് വിരമിക്കാന് സമയമായെന്നും ഗവാസ്ക്കര് വ്യക്തമാക്കിയിരുന്നു.
സ്വന്തം തീരുമാന പ്രകാരമാണ് വിന്ഡീസ് പര്യടനത്തില് നിന്നും ധോണി വിട്ടു നിന്നത്. രണ്ടു മാസത്തേക്ക് തന്നെ ടീമിലേക്ക് പരിഗണിക്കേണ്ടതില്ലെന്നും ധോണി പറഞ്ഞിരുന്നു. വിരമിക്കലും തിരിച്ചു വരവും അവധിയും ചര്ച്ചയാകുമ്പോഴും ധോണിയുടെ തിരിച്ചു വരവിനായി കാത്തിരിക്കുകയാണ് ആരാധകര്.
