ന്യൂഡല്ഹി: അന്താരാഷ്ട്ര സുരക്ഷാ കാര്യത്തില് സമുദ്രമേഖലയാണ് ഇനിയുള്ളകാലത്ത് ഏറ്റവും നിര്ണ്ണായകമായ പ്രദേശമെന്ന് കേന്ദ്ര സുരക്ഷാ ഉപദേഷ്ടാവ് അജിത് ഡോവല്.രാജ്യങ്ങള് അവരവരുടെ സമുദ്രാതിര്ത്തികളില് സ്വീകരിക്കുന്ന നയങ്ങളാണ് സുരക്ഷ ശക്തമാക്കുക. പരസ്പര സഹകരണം വഴി മാത്രമേ സമുദ്രമേഖലയിലെ വെല്ലുവിളികളെ നേരിടാനാകൂ എന്നും ഡോവല് പറഞ്ഞു.ഭാരതം ഒരു തരത്തിലുമുള്ള സഖ്യശക്തികളുടേയും ഭാഗമല്ല.അതുപോലെ സുരക്ഷാസഹകരണകാര്യത്തില് ആരുടേയും നിയന്ത്രണത്തിലുമല്ലന്നും ഡോവല് വ്യക്തമാക്കി.
‘സമുദ്രമേഖല രാജ്യങ്ങളുടെ പരസ്പരം സഹകരണത്തിന്റെയും സാമ്പത്തിക വ്യപാരമേഖലയുടേയും ബാഹ്യമായവെല്ലുവിളികളുടേയും തട്ടകമാണ്.നമ്മളെല്ലാവരും അതിവിശാലമായ ഇന്ത്യന് മഹാസമുദ്രത്തിന്റെയും പെസഫിക് സമുദ്രത്തിന്റെയും വെല്ലുവിളികളും അനന്തസാധ്യതകളും ഒരുപോലെ അനുഭവിക്കുന്നവരാണ്.’ ഗോവയില് നടക്കുന്ന സമുദ്രമേഖലാ സെമിനാറില് സംസാരിക്കുകയായിരുന്നു അജിത് ഡോവല്.
ഇന്ത്യയും അയല്രാജ്യങ്ങളും സുപ്രധാനമായ സമുദ്രസുരക്ഷാ നയം രൂപീകരിക്കണം.ഒറ്റയ്ക്ക ഒന്നും ചെയ്യാനാകില്ല.കാരണം പ്രദേശങ്ങള് അത്രയ്ക്കും വലുതാണ്.ഒരോരുത്തരും മറ്റുള്ളവരെക്കൂടി സഹായിക്കുമെന്ന സാഹചര്യമാണ് സൃഷ്ടിക്കേണ്ടതെന്നും ഡോവല് പറഞ്ഞു.വരുന്ന കാലഘട്ടത്തില് കടല്,ബഹിരാകാശം,സൈബര് മേഖല എന്നിവയാണ് സുരക്ഷ നിയന്ത്രിക്കാന് പോകുന്നത്.ഈ മൂന്ന് മേഖലയിലും പരസ്പര സഹകരണത്തോടെയുള്ള നയങ്ങള് നിര്ണ്ണായകമാണ്. ഡോവല് വ്യക്തമാക്കി.
