ശ്രീനഗര്: ജമ്മുകശ്മീര് മേഖലയിലെ മുഴുവന് ജലവൈദ്യുത കേന്ദ്രത്തിനും ഡാമിനും അതിശക്തമായ സുരക്ഷ ഏര്പ്പെടുത്താന് സെന്ട്രല് ഇന്ഡസ്ട്രീയല് സെക്യൂരിറ്റി ഫോഴ്സിന് പൂര്ണ്ണ ചുമതല നല്കി. നിരന്തരം ഭീകരാക്രമണ ഭീഷണി നിലനില്ക്കുന്നതിനാലാണ് പണി നടന്നുകൊണ്ടിരിക്കുന്ന പദ്ധതിയുടെ സംരക്ഷണമടക്കം കേന്ദ്ര സര്ക്കാര് സിഐഎസ്എഫിനെ ഏല്പ്പിച്ചത്. ജമ്മുകശ്മീര് മേഖലയിലെ ഡാം നിര്മ്മാണത്തിനെതിരെ പാകിസ്ഥാന് പലതവണ രംഗത്ത് വന്നിരുന്നു.
കേന്ദ്ര ആഭ്യന്തര മന്ത്രാലയത്തിന്റെ തീരുമാനം വന്നതോടെ മൂന്ന് തലത്തിലുള്ള അതിശക്തമായ സുരക്ഷാ ക്രമീകരണമാണ് നല്കുക. ഭീകരാക്രമണമുള്പ്പടെ തകര്ക്കാന് ശേഷിയുള്ള 300 സൈനികരാണ് നിയോഗിക്കപ്പെട്ടിരിക്കുന്നത്.നിലവില് ജമ്മുകശ്മീര് മേഖലയുടെ മൊത്തം സുരക്ഷയ്ക്കായി 3000 സിഐഎസ്എഫ് സൈനികരാണ് സേവനത്തിലുള്ളത്. അതിന്റെ 10ശതമാനം പേരെയാണ് നിയോഗിക്കുക.
ബാഗ്ലിഹാര് അണക്കെട്ടിന് ഏതാനും കിലോമീറ്റര് അകലെ ഭീകരന്മാരെ സൈന്യം വധിച്ചതിന്റെ പശ്ചാത്തലത്തിലാണ് കനത്ത സുരക്ഷയെന്ന് സൈനിക വക്താവ് അറിയിച്ചു. നിലവില് ഉറി അണക്കെട്ടിനാണ് കൂടുതല് സുരക്ഷയുള്ളത്.മൊത്തം 600 സൈനികരെയാണ് നിലവില് ഉറിയിലെ രണ്ട് അണക്കെട്ടുകളുടെ സുരക്ഷയ്ക്കായി നിയോഗിച്ചിരിക്കുന്നത്.