മമ്മൂട്ടി നായകനായെത്തുന്ന ബിഗ് ബജറ്റ് ചിത്രം മാമാങ്കത്തിന്റെ റിലീസ് തീയതി മാറ്റി. ഡിസംബർ 12 ലേക്കാണ് റിലീസ് മാറ്റിയിരിക്കുന്നത്. നവംബർ 21 ന് റിലീസ് ചെയ്യാനാണ് ഉദ്ദേശിച്ചിരുന്നതെങ്കിലും മറ്റ് ഭാഷകളിൽ കൂടി റിലീസ് ചെയ്യുന്നതിനാൽ റിലീസ് മാറ്റുകയായിരുന്നു. മറ്റ് ഭാഷകളിൽ ഇറക്കുന്നതിന്റെ അവസാന ജോലികൾ നടന്നുവരികയാണ്.
റിലീസ് നീട്ടിയതിനാൽ ആരാധകരോട് ക്ഷമചോദിച്ച് അണിയറ പ്രവർത്തകർ തന്നെ രംഗത്തെത്തി. മലയാളത്തിനു പുറമെ മറ്റു ഭാഷകളിൽ റിലീസ് ചെയ്യുന്നതിനാൽ നമ്മൾ ഒരുപാട് ബുദ്ധിമുട്ടുകൾ നേരിടേണ്ടി വന്നു. സിനിമയുടെ റിലീസ് നീണ്ടതിൽ മാമാങ്കം ടീം മാപ്പ് ചോദിക്കുന്നു. സിനിമയുടെ മറ്റുള്ള ജോലികൾ പുരോഗമിക്കുകയാണെന്നും അണിയറ പ്രവർത്തകർ അറിയിച്ചു.
മലയാളത്തിലെ ഏറ്റവും ചിലവേറിയ ചിത്രമായിരിക്കും മാമാങ്കമെന്നാണ് അണിയറപ്രവർത്തകരുടെ അവകാശം. അതോടൊപ്പം വടക്കൻ വീരഗാഥ, മാമാങ്കം എന്നീ ചിത്രങ്ങൾക്ക് ശേഷം മമ്മൂട്ടി പ്രധാനകഥാപാത്രത്തിലെത്തുന്ന ചരിത്ര സിനിമ എന്ന പ്രത്യേകതയുമുണ്ട് മാമാങ്കത്തിന്.
എം.പദ്മകുമാർ സംവിധാനം ചെയ്യുന്ന ചിത്രത്തിൽ മമ്മൂട്ടിയെ കൂടാതെ ഉണ്ണി മുകുന്ദൻ, അനു സിതാര, കനിഹ, സിദ്ദിഖ്, തരുൺ അറോറ, സുദേവ് നായർ, സുരേഷ് കൃഷ്ണ, മാസ്റ്റർ അച്യുതൻ തുടങ്ങിയവർ പ്രധാന വേഷങ്ങളിലെത്തും. കാവ്യ ഫിലിം കമ്പനിയുടെ ബാനറിൽ പ്രവാസി വ്യവസായിയായ വേണു കുന്നപ്പള്ളിയാണ് ഈ ചിത്രം നിർമ്മിച്ചിരിക്കുന്നത്. എം ജയചന്ദ്രനാണ് സംഗീത സംവിധാനം.
