കോഴിക്കോട്: കമ്മ്യൂണിസ്റ്റ് ഭീകരരെ സഹായിക്കുന്നത് ഇസ്ലാമിക ഭീകര സംഘടനകളാണെന്ന പ്രസ്താവനയില്‍ വിശദീകരണവുമായി സിപിഎം കോഴിക്കോട് ജില്ലാ സെക്രട്ടറി പി.മോഹനന്‍. താന്‍ പറഞ്ഞത് യാഥാര്‍ത്ഥ്യമാണെന്നും എന്‍ഡിഎഫ്, പോപ്പുലര്‍ ഫ്രണ്ട് സംഘടനകളെയാണ് ഉദ്ദേശിച്ചതെന്നും പി മോഹനനന്‍ പറഞ്ഞു.
കോഴിക്കോടിന്റെ പശ്ചാത്തലത്തിലാണ് താന്‍ ഇത് പറയുന്നതെന്നും പരാമര്‍ശത്തില്‍ ഉറച്ച് നില്‍ക്കുന്നുവെന്നും മോഹനന്‍ വ്യക്തമാക്കി. എല്ലാ മുസ്ലിങ്ങളെയുമല്ല, ഇസ്ലാം ഭീകരരെയാണ് താന്‍ വിമര്‍ശിച്ചത്. പാര്‍ട്ടിയുടെ നിലപാടാണ് വ്യക്തമാക്കിയത് അല്ലാതെ വ്യക്തിപരമായ അഭിപ്രയമല്ലെന്നും അദ്ദേഹം പറഞ്ഞു.
നേരത്തെ കമ്മ്യൂണിസ്റ്റ് ഭീകര സംഘടനയില്‍ ഉണ്ടായിരുന്നവര്‍ ഈ സംഘടനകളില്‍ പ്രവര്‍ത്തിക്കുന്നുണ്ട്. പന്തീരങ്കാവ് സംഭവത്തില്‍ ഈ സംഘടനകള്‍ക്ക് സ്വാധീനമുണ്ടെന്നും അദ്ദേഹം സൂചിപ്പിച്ചു. താഹ,അലന്‍ എന്നിവര്‍ക്ക് ഭീകര ബന്ധമുണ്ടെന്ന് പറഞ്ഞിട്ടില്ല. എന്നാല്‍ അവരുടെ കമ്മ്യൂണിസ്റ്റ് ഭീകര ബന്ധം പരിശോധിച്ചു വരികയാണെന്നും പി മോഹനന്‍ കൂട്ടിച്ചേര്‍ത്തു.
കമ്മ്യൂണിസ്റ്റ് ഭീകരരെ സഹായിക്കുന്നത് കോഴിക്കോടുള്ള ഇസ്ലാമിക സംഘടനകളാണെന്ന് കഴിഞ്ഞ ദിവസം പ്രസംഗത്തിനിടെ മോഹനന്‍ പറഞ്ഞിരുന്നു. ഇവര്‍ക്ക് വെള്ളവും വളവും നല്‍കുന്നത് തീവ്ര ഇസ്ലാമിക് സംഘടനകളാണെന്നും മോഹനന്‍ പറഞ്ഞിരുന്നു. കമ്മ്യൂണിസ്റ്റ് ഭീകര ബന്ധത്തിന്റെ പേരില്‍ രണ്ടു സിപിഎം പ്രവര്‍ത്തകര്‍ക്കെതിരെ യുഎപിഎ ചുമത്തിയ നടപടി തിരുത്തണമെന്നമെന്ന് സിപിഎം പോളിറ്റ് ബ്യൂറോ നിര്‍ദ്ദേശം നല്‍കിയതിനു പിന്നാലെയാണ് കോഴിക്കോട് ജില്ലാ സെക്രട്ടറിയുടെ പരാമര്‍ശം.
