ലണ്ടന്: ഇംഗ്ലീഷ് പ്രീമിയര് ലീഗ് 17-ാം ദിനത്തിലെ മല്സരത്തില് ചെല്സിക്ക് അപ്രതീക്ഷിത തോല്വി. മറ്റ് മത്സരങ്ങളില് ഷെഫ് യുണൈറ്റഡും വെസ്റ്റ്ഹാമും ജയം നേടി. ആദ്യ മത്സരത്തില് ചെല്സി ബേണ്മൗത്തിനോട് ഒറ്റ ഗോളിനാണ് തോറ്റത്. ഷെഫ് യുണൈറ്റഡ് എതിരില്ലാത്ത രണ്ടു ഗോളുകള്ക്ക് ആസ്റ്റണ് വില്ലയെ തോല്പ്പിച്ചപ്പോള്, വെസ്റ്റ് ഹാമിന്റെ ജയം സതാംപടണിനെതിരെ ഏക ഗോളിനായിരുന്നു.
നിര്ഭാഗ്യങ്ങളുടെ ദിവസമായിരുന്നു ഇന്നലെ ചെല്സിക്ക്. ഭൂരിഭാഗം സമയവും പന്ത് കൈവശംവച്ചിട്ടും ഗോളടിക്കാനായില്ല. 18 ഷോട്ടുകളില് 5 എണ്ണം ലക്ഷ്യത്തിന് നേരെതൊടുത്തിട്ടും ഒന്നുപോലും വലയില് കയറിയില്ല. കളിയുടെ അവസാന സമയത്താണ് കിട്ടിയ അവസരം ലീഗില് ബേണ്മൗത്ത് മുതലാക്കിയത്. 84-ാം മിനിറ്റില് ഡാന് ഗോസ്ലിംഗാണ് വിജയഗോളിന്റെ ശില്പി.
രണ്ടാംമത്സരത്തില് ഷെഫ് യുണൈറ്റഡ് എതിരില്ലാത്ത രണ്ടു ഗോളിനാണ് അസ്റ്റണ് വില്ലയെ തോല്പ്പിച്ചത്. മികച്ച പാസ്സുകളും പന്തടക്കവുമായി കളിച്ച ഷെഫ് താരങ്ങള്ക്ക് ആദ്യ പകുതിയില് കിട്ടിയ അവസരങ്ങള് പക്ഷെ ഗോളാക്കാനായില്ല. രണ്ടാം പകുതിയില് ജോണ് ഫ്ലെക്കാണ് ഇരട്ടഗോളുകളോടെ ടീമിന് ഉശിരന് ജയം നല്കിയത്. 50-ാം മിനിറ്റിലും 73-ാം മിനിറ്റിലുമാണ് ഗോളുകള് വീണത്. മൂന്നാം മത്സരത്തില് സതാംപ്ടണിനെതിരെ വെസ്റ്റ് ഹാമിന്റെ ജയം ഒറ്റ ഗോളിനായിരുന്നു. സെബാസ്റ്റയ്ന് ഹാലെറാണ് 37-ാം മിനിറ്റില് ഗോളടിച്ചത്. പൊരുതിക്കളിച്ചിട്ടും സതാംപടണിന് ഗോളടിക്കാനായില്ല.
