മെല്‍ബണ്‍: ഓസ്‌ട്രേലിയയിലെ മെല്‍ബണില്‍ ഇന്ത്യന്‍ സമൂഹത്തെ അഭിസംബോധന ചെയ്ത പ്രധാനമന്ത്രി നരേന്ദ്ര മോദി, ഇന്ത്യയുടെ തദ്ദേശീയ പ്രതിരോധശേഷി ലോകത്തിന്റെ അംഗീകാരം നേടിയതായി പറഞ്ഞു. ‘ഓപ്പറേഷന്‍ സിന്ദൂര്‍’ ഇന്ത്യയുടെ സൈനിക കരുത്തിന്റെയും ഭീകരവിരുദ്ധ നിലപാടിന്റെയും വ്യക്തമായ തെളിവാണെന്നും അദ്ദേഹം വ്യക്തമാക്കി.
ഭീകരകേന്ദ്രങ്ങള്‍ക്കെതിരെ നടത്തിയ ആക്രമണത്തെ പരാമര്‍ശിച്ച മോദി, ‘ഓപ്പറേഷന്‍ സിന്ദൂറിനിടെ ഭീകരരുടെ താവളങ്ങളില്‍ ഉണ്ടായ സ്‌ഫോടനങ്ങളുടെ പ്രതിധ്വനി ലോകമെമ്പാടും കേട്ടു. ആ നിര്‍ണായക ആക്രമണം നിങ്ങളില്‍ അഭിമാനം ഉണര്‍ത്തിയില്ലേ?’ എന്ന് ചോദിച്ചപ്പോള്‍ സദസ്സില്‍ നിന്ന് വന്‍ കൈയടിയാണ് ഉയര്‍ന്നത്.
21-ാം നൂറ്റാണ്ടിലെ ഇന്ത്യ വികസിത രാഷ്‌ട്രമാകാനുള്ള ലക്ഷ്യത്തിലേക്ക് അതിവേഗം മുന്നേറുകയാണെന്ന് അദ്ദേഹം പറഞ്ഞു. ‘മേക്ക് ഇന്‍ ഇന്ത്യ’ പദ്ധതി ഇന്ന് ആഗോള ബ്രാന്‍ഡായി മാറിയെന്നും ഇന്ത്യയില്‍ നിര്‍മ്മിക്കുന്ന മൊബൈല്‍ ഫോണുകള്‍, ഇലക്ട്രോണിക് ഉപകരണങ്ങള്‍, വാഹനങ്ങള്‍, ഔഷധ ഉല്‍പ്പന്നങ്ങള്‍ എന്നിവ ലോകവിപണിയില്‍ ശക്തമായ സാന്നിധ്യം ഉറപ്പിച്ചിട്ടുണ്ടെന്നും അദ്ദേഹം ചൂണ്ടിക്കാട്ടി.
‘ഒരു സ്വപ്‌നം സാക്ഷാത്കരിക്കുമ്പോള്‍ മറ്റൊരു വലിയ സ്വപ്‌നം ജനിക്കുന്നു. ഒരു നേട്ടം കൈവരിക്കുമ്പോള്‍ അതിലും വലിയ ലക്ഷ്യത്തിലേക്കാണ് ഇന്ത്യ മുന്നേറുന്നത്,’ എന്നും അദ്ദേഹം പറഞ്ഞു. ലോകത്തിലെ ഏറ്റവും വേഗത്തില്‍ വളരുന്ന പ്രധാന സമ്പദ്വ്യവസ്ഥയാണ് ഇന്ത്യയെന്നും, എത്രയും വേഗം ലോകത്തെ ആദ്യ മൂന്ന് സാമ്പത്തിക ശക്തികളില്‍ ഒന്നാകുക എന്നതാണ് രാജ്യത്തിന്റെ ലക്ഷ്യമെന്നും പ്രധാനമന്ത്രി വ്യക്തമാക്കി.
സാങ്കേതിക രംഗത്തെ പുരോഗതി എടുത്തുപറഞ്ഞ അദ്ദേഹം, ഇന്ത്യ ഇന്ന് ലോകത്തിലെ രണ്ടാമത്തെ വലിയ 5ജി വിപണിയായി മാറിയെന്നും, തദ്ദേശീയ 6ജി സാങ്കേതികവിദ്യ വികസിപ്പിക്കുന്നതിനുള്ള പ്രവര്‍ത്തനങ്ങള്‍ വേഗത്തിലാക്കിയിട്ടുണ്ടെന്നും പറഞ്ഞു.
മെല്‍ബണില്‍ ലഭിച്ച ഊഷ്മള സ്വീകരണത്തിന് ഇന്ത്യന്‍ സമൂഹത്തിനും ഓസ്‌ട്രേലിയന്‍ ജനങ്ങള്‍ക്കും നന്ദി അറിയിച്ച മോദി, ‘മെല്‍ബണ്‍ ശരിക്കും ഷോ മോഷ്ടിച്ചു’ എന്ന് വിശേഷിപ്പിച്ചു. ഓസ്‌ട്രേലിയന്‍ പ്രധാനമന്ത്രി ആന്റണി അല്‍ബനീസിനെ ‘ഇന്ത്യയുടെ സുഹൃത്ത്’ എന്ന് വിശേഷിപ്പിച്ച അദ്ദേഹം, സിഡ്നിക്ക് പിന്നാലെ മെല്‍ബണിലും ഇരുവരും ഒരുമിച്ച് വേദി പങ്കിട്ടതിനെക്കുറിച്ചും പരാമര്‍ശിച്ചു.
ലോകമെമ്പാടുമുള്ള ഇന്ത്യന്‍ പ്രവാസികള്‍ ഇന്ത്യയുടെ അഭിമാനം ഉയര്‍ത്തിപ്പിടിക്കുന്നവരാണെന്നും, സത്യനാരായണ പൂജകള്‍, ഗുരുദ്വാരകളിലെ അര്‍ദാസ്, ഭാരതനാട്യം, ഭാങ്ഗ്ര, ക്രിക്കറ്റ് ടൂര്‍ണമെന്റുകള്‍, മെല്‍ബണില്‍ നടക്കാനിരിക്കുന്ന ഇന്ത്യന്‍ ഫിലിം ഫെസ്റ്റിവല്‍ തുടങ്ങിയ പരിപാടികളിലൂടെ ഇന്ത്യന്‍ സംസ്‌കാരവും പാരമ്പര്യവും വിദേശരാജ്യങ്ങളിലും ശക്തമായി നിലനില്‍ക്കുകയാണെന്നും പ്രധാനമന്ത്രി കൂട്ടിച്ചേര്‍ത്തു.
