തിരുവനന്തപുരം: വര്ക്കല റാത്തിക്കലില് 19കാരിയായ നവവധു മരിച്ചു. റാത്തിക്കല് നാസിയ മന്സിലില് നൗഷാദിന്റെയും സഹീറയുടെയും മകളായ നാസിയ (വാവ)യാണ് മരിച്ചത്. ബുധനാഴ്ച വൈകിട്ടാണ് സംഭവം. വീട്ടിലെ കിടപ്പുമുറിയില് ഗുരുതരാവസ്ഥയില് കണ്ടെത്തിയ നാസിയയെ ആദ്യം വര്ക്കലയിലെ സ്വകാര്യ ആശുപത്രിയിലും തുടര്ന്ന് തിരുവനന്തപുരത്തെ സ്വകാര്യ ആശുപത്രിയിലും പ്രവേശിപ്പിച്ചെങ്കിലും ഇന്ന് പുലര്ച്ചെയോടെ മരണം സ്ഥിരീകരിച്ചു.
രണ്ടുമാസം മുന്പാണ് നാസിയയുടെ വിവാഹം നടന്നത്. പരവൂര് തെക്കുംഭാഗം സ്വദേശിയായ മാണിക്കഴികം വീട്ടില് അന്സറാണ് ഭര്ത്താവ്. വിവാഹം കഴിഞ്ഞ് 13 ദിവസം പിന്നിട്ടപ്പോഴേക്കും ജോലിസംബന്ധമായി അന്സര് കുവൈത്തിലേക്ക് മടങ്ങിയിരുന്നു. ഭര്ത്താവില് നിന്ന് അകന്നു കഴിയേണ്ടി വന്നതിനെ തുടര്ന്ന് നാസിയ മാനസിക വിഷമത്തിലായിരുന്നുവെന്നാണ് കുടുംബാംഗങ്ങള് അറിയിച്ചതായി പൊലീസ് പറയുന്നു.
മരണവുമായി ബന്ധപ്പെട്ട് കൂടുതല് അന്വേഷണം വര്ക്കല പൊലീസ് ആരംഭിച്ചിട്ടുണ്ട്. വിവാഹം കഴിഞ്ഞ് രണ്ടുമാസം മാത്രമായതിനാല് നിയമനടപടികളുടെ ഭാഗമായി ആര്ഡിഒയുടെ സാന്നിധ്യത്തിലായിരിക്കും ഇന്ക്വസ്റ്റ് നടപടികള് നടക്കുക. തുടര്ന്ന് പോസ്റ്റ്മോര്ട്ടത്തിനായി മൃതദേഹം തിരുവനന്തപുരം മെഡിക്കല് കോളേജ് ആശുപത്രിയിലേക്ക് മാറ്റും.
