മുംബൈ: ക്രിക്കറ്റിലെ വ്യാപാരോത്സവ ലേലം മുറുകുമ്പോള് അപ്രതീക്ഷിത നേട്ടങ്ങളുമായി കൗമാര താരങ്ങള് ഞെട്ടിക്കുന്നു. നിലവില് ഇന്ത്യന് ടീമില് കളിക്കാത്ത 12 കൗമാര താരങ്ങളെ സ്വന്തമാക്കാന് ഐപിഎല് മുന്നിര ടീമുകള് മത്സരിക്കുന്ന കാഴ്ചയാണ് ലേലത്തില് ആദ്യമേ കണ്ടത്. 12ല് 6 പേരും ലേലത്തിന്റെ തുടക്കത്തിലേ തന്നെ കോടിപതികളായി മാറി. ഇതിനിടെ ആദ്യ റൗണ്ടുകളിലൊന്നും കേരളതാരങ്ങളെ ഭാഗ്യം കടാക്ഷിച്ചിട്ടില്ല.
കൊല്ക്കത്തയാണ് ഏറ്റവും കാശുമുടക്കി കൗമാര പ്രതിഭയെ സ്വന്തമാക്കിയത്. വരുണ് ചക്രവര്ത്തിയാണ് 4 കോടിരൂപ ലേലത്തില് നൈറ്റ് റൈഡേഴ്സിന്റെ പാളയത്തിലെത്തിയത്. തൊട്ടുപുറകേ വന്തരംഗമായിക്കഴിഞ്ഞ മുംബൈയുടെ യശസ്വി ജയ്സ്വാളിനെ 2.40കോടിക്ക് രാജസ്ഥാന് റോയല്സ് റാഞ്ചി. കൂട്ടത്തിലവര് 1.30കോടിക്ക് കാര്ത്തിക് ത്യാഗിയേയും എടുത്തു.
പഞ്ചാബ് കൗമാരക്കാരില് രവി ബിഷ്ണോയിയെ 2 കോടിക്ക് നേടിയപ്പോള് സണ്റൈസേഴ്സ് ഹൈദരാബാദ് വിരാട് സിന്ഹയെ 2 കോടിക്കും നിലവിലെ അണ്ടര് -19 ടീം ഇന്ത്യ ക്യാപ്റ്റന് പ്രിയം ഗാര്ഗിനെ 1.9 കോടിക്കും സ്വന്തമാക്കി.
