ഖത്തര്: ഖലീഫാ സ്റ്റേഡിയത്തില് ഇംഗ്ലീഷ് സൂപ്പര് ക്ലബ്ബായ ലിവര്പൂള് ലോകകിരീടം ചൂടി. ക്ലബ്ബ് ഫുട്ബോള് ലോകകപ്പിന്റെ ഫൈനലില് ബ്രസീലിയന് ക്ലബ്ബായ ഫ്ളെമിംഗോയെ എതിരില്ലാത്ത ഒരു ഗോളിനാണ് ലിവര്പൂള് പരാജയപ്പെടുത്തിയത്. ഖലീഫാ സ്റ്റേഡിയത്തിലായിരുന്നു മത്സരം.
ക്ലബ്ബ് ഫുട്ബോള് ചരിത്രത്തില് ആദ്യമായാണ് ലിവര്പൂള് കിരീടം നേടുന്നത്. നിലവിലെ ചാമ്പ്യന്സ് ലീഗ് കിരീട ജേതാക്കള്ക്ക് ഈ വര്ഷം ഇത് മൂന്നാം കിരീടമായി. നേരത്തെ ചാമ്പ്യന്സ് ലീഗിനൊപ്പം യുവേഫാ സൂപ്പര് കപ്പും നേടിയിരുന്നു.
കളിയുടെ രണ്ടുപകുതിയിലും ശക്തരായ ലിവര്പ്പൂളിനെ അതീവ പന്തടക്കത്താല് ബ്രസീലിയന് ക്ലബ്ബ് പിടിച്ചുകെട്ടി. എന്നാല് 99-ാം മിനിറ്റില് റോബര്ട്ടോ ഫിര്മിനോ വിജയ ഗോള് നേടി. തനിക്ക് വലതുവശത്തു നിന്ന് കിട്ടിയ പന്തുമായി ഫ്ളെമിംഗോ ഗോള്മുഖത്തേക്ക് മധ്യഭാഗത്തുകൂടെത്തന്നെ പാഞ്ഞുകയറിയ ഫിര്മിനോ ഗോളിയടക്കം മൂന്നുപേരെ വെട്ടിച്ചാണ് പോസ്റ്റിന്റെ വലതുമൂലയിലേക്ക് പന്തുപായിച്ചത്.
കഴിഞ്ഞ ജൂണിലാണ് ലിവര്പൂള് ചാമ്പ്യന്സ് ലീഗ് പട്ടം നേടിയത്. തുടര്ന്ന് ആഗസ്റ്റില് സൂപ്പര് കപ്പ് കിരീടം നേടി. 47-ാംമത്തെ പ്രധാനകിരീടത്തോടെയാണ് ലിവര്പൂള് 2019നെ യാത്രയാക്കുന്നത്.
