തിരുവനന്തപുരം: ഓണക്കാലത്തെ യാത്രക്കാരുടെ തിരക്ക് പരിഗണിച്ച് കേരളത്തിലേക്കും കേരളത്തിൽ നിന്നുമുള്ള വിവിധ റൂട്ടുകളിൽ മൂന്ന് പ്രതിവാര സ്പെഷ്യൽ ട്രെയിനുകൾ പ്രഖ്യാപിച്ച് റെയിൽവേ. മംഗളൂരു–ചെന്നൈ എഗ്മോർ, ചെന്നൈ സെൻട്രൽ–കൊല്ലം, തിരുവനന്തപുരം–താംബരം റൂട്ടുകളിലായാണ് പ്രത്യേക സർവീസുകൾ നടത്തുക. ആകെ 32 സ്പെഷ്യൽ സർവീസുകളാണ് ഓണക്കാലത്ത് ക്രമീകരിച്ചിരിക്കുന്നത്.
ആഗസ്റ്റ് 12 മുതൽ സെപ്റ്റംബർ 3 വരെ പ്രത്യേക സർവീസുകൾ നടത്തും. ട്രെയിനുകളിലേക്കുള്ള റിസർവേഷൻ വ്യാഴാഴ്ച രാവിലെ 8 മണി മുതൽ ആരംഭിക്കുമെന്ന് റെയിൽവേ അറിയിച്ചു.
ചെന്നൈ സെൻട്രൽ–കൊല്ലം സ്പെഷ്യൽ (06119/06120)
ബുധനാഴ്ചകളിൽ ഉച്ചകഴിഞ്ഞ് 3.10ന് ചെന്നൈ സെൻട്രലിൽ നിന്ന് പുറപ്പെടുന്ന ട്രെയിൻ പിറ്റേന്ന് രാവിലെ 7.20ന് കൊല്ലത്ത് എത്തും. മടക്ക സർവീസ് വ്യാഴാഴ്ച രാവിലെ 10.40ന് കൊല്ലത്ത് നിന്ന് പുറപ്പെട്ട് പിറ്റേന്ന് പുലർച്ചെ 3.30ന് ചെന്നൈയിലെത്തും.
ഈ ട്രെയിനിൽ 16 തേഡ് എസി ഇക്കോണമി കോച്ചുകൾ മാത്രമാണുള്ളത്. സ്ലീപ്പർ കോച്ചുകൾ ഉണ്ടായിരിക്കില്ല. പാലക്കാട്, തൃശൂർ, ആലുവ, എറണാകുളം ടൗൺ, കോട്ടയം, ചങ്ങനാശേരി, തിരുവല്ല, ചെങ്ങന്നൂർ, മാവേലിക്കര, കായംകുളം എന്നിവിടങ്ങളിൽ സ്റ്റോപ്പുണ്ട്.
താംബരം–തിരുവനന്തപുരം സ്പെഷ്യൽ (06109/06110)
വ്യാഴാഴ്ചകളിൽ ഉച്ചയ്ക്ക് 2 മണിക്ക് താംബരത്ത് നിന്ന് പുറപ്പെടുന്ന ട്രെയിൻ പിറ്റേന്ന് രാവിലെ 7.15ന് തിരുവനന്തപുരത്തെത്തും. മടക്ക സർവീസ് ബുധനാഴ്ചകളിൽ വൈകിട്ട് 3.45ന് തിരുവനന്തപുരത്ത് നിന്ന് പുറപ്പെട്ട് പിറ്റേന്ന് രാവിലെ 10 മണിക്ക് താംബരത്തെത്തും.
ട്രെയിനിൽ 2 സെക്കൻഡ് എസി, 4 തേഡ് എസി, 4 തേഡ് എസി ഇക്കോണമി, 6 സ്ലീപ്പർ കോച്ചുകൾ ഉൾപ്പെടുത്തിയിട്ടുണ്ട്. കൊല്ലം, കൊട്ടാരക്കര, തെങ്കാശി, മധുര, തിരുച്ചിറപ്പള്ളി വഴിയാണ് സർവീസ്.
മംഗളൂരു–ചെന്നൈ എഗ്മോർ സ്പെഷ്യൽ (06126/06125)
ജൂലൈ 13 മുതൽ ആഗസ്റ്റ് 31 വരെ എല്ലാ തിങ്കളാഴ്ചകളിലും വൈകിട്ട് 4 മണിക്ക് മംഗളൂരുവിൽ നിന്ന് പുറപ്പെട്ട് പിറ്റേന്ന് രാവിലെ 10.55ന് ചെന്നൈ എഗ്മോറിലെത്തും.
മടക്ക സർവീസ് ജൂലൈ 14 മുതൽ സെപ്റ്റംബർ 1 വരെ എല്ലാ ചൊവ്വാഴ്ചകളിലും ഉച്ചയ്ക്ക് 2 മണിക്ക് ചെന്നൈ എഗ്മോറിൽ നിന്ന് പുറപ്പെട്ട് പിറ്റേന്ന് രാവിലെ 8.40ന് മംഗളൂരുവിലെത്തും.
കേരളത്തിൽ കാസർകോട്, കാഞ്ഞങ്ങാട്, പയ്യന്നൂർ, കണ്ണൂർ, തലശ്ശേരി, വടകര, കോഴിക്കോട്, തിരൂർ, ഷൊർണൂർ, പാലക്കാട് എന്നിവിടങ്ങളിലാണ് ഈ ട്രെയിനിന് സ്റ്റോപ്പുള്ളത്.
ഓണക്കാലത്തെ യാത്രാ തിരക്ക് കുറയ്ക്കുന്നതിനും യാത്രക്കാർക്ക് കൂടുതൽ സൗകര്യമൊരുക്കുന്നതിനുമാണ് പ്രത്യേക സർവീസുകൾ അനുവദിച്ചതെന്ന് റെയിൽവേ അറിയിച്ചു.
