മാഡ്രിഡ്: ലാ ലീഗായിലെ 18-ാം കളിദിനത്തില് ബാഴ്സ, സെവിയ, വിയാ റയലെന്നീ ടീമുകള് ജയത്തോടെ മുന്നേറി. എന്നാല് വലന്സിയ വല്ലാഡോലിഡിനോഡ് തോല്ക്കാതെ രക്ഷപെട്ടു.
മെസ്സി 50-ാം ഗോള് കുറിച്ച മത്സരത്തില് ഒന്നിനെതിരെ നാലു ഗോളുകള്ക്കാണ് ബാഴ്സ എതിരാളികളായ ആല്വെസിനെ തകര്ത്തുവിട്ടത്. 14-ാം മിനിറ്റില്ത്തന്നെ ബാഴ്സ ഗ്രീസ്മാനിലൂടെ മുന്നിലെത്തി. 45-ാം മിനിറ്റില് വിദാല് ലീഡുയര്ത്തി. രണ്ടാംപകുതിയുടെ തുടക്കത്തില് ആല്വസിനായി പേരേ പോണ്സ് ഒരു ഗോള് തിരിച്ചടിച്ചു. 56-ാം മിനിറ്റിലാണ് ഗോള് വീണത്.
തുടര്ന്നങ്ങോട്ട് സൂപ്പര് താരങ്ങളുടെ അടക്കിവാഴലായിരുന്നു. 69-ാം മിനിറ്റില് മെസ്സിയും 75-ാം മിനിറ്റില് പെനാല്റ്റി മുതലാക്കി സുവാരസും ഗോള് നില നാലാക്കി ഉയര്ത്തി. ഈ സീസണില് 58 കളികളിലായി 50 ഗോളെന്ന നേട്ടവും ഗോളിലൂടെ ലയണല് മെസ്സി നേടി.
രണ്ടാം മല്സരത്തില് സെവിയ രണ്ടു ഗോളുകള്ക്കാണ് മല്ലോര്ക്കയെ തോല്പ്പിച്ചത്. 20-ാം മിനിറ്റില് ഡീഗോ സില്വിയയും 63-ാം മിനിറ്റില് പെനാല്റ്റിയിലൂടെ എവര് ബെനേഗയും ഗോള് നേടി. മൂന്നാം മത്സരത്തില് വില്ലാറയല് ഏക ഗോളിന് ഗെറ്റഫയെ കീഴടക്കിയപ്പോള് വലന്സിയയും വല്ലാഡോലിഡും തമ്മിലുള്ള മത്സരം ഒരോ ഗോള് വീതമടിച്ച് സമനിലയില് പിരിഞ്ഞു. വില്ലാറയിലിന് വേണ്ടി 52-ാം മിനിറ്റില് ഗോമസാണ് ഗോള് നേടിയത.
നാലാം മത്സരത്തില് ഭൂരിഭാഗം സമയത്തും ഇരുടീമുകളും ഗോളടിച്ചില്ല. എന്നാല് വലന്സിയയെ ഞെട്ടിച്ചുകൊണ്ട് 83-ാം മിനിറ്റില് നവാരോ ലീഡ് നേടി. ഗോള് വീണതോടെ ഉണര്ന്നു കളിച്ച വലന്സിയ അധികസമയത്ത് ഗോള് തിരിച്ചടിച്ച് തോല്വി ഒഴിവാക്കി. 94-ാം മിനിറ്റില് മനു വല്ലേജോയാണ് സമനില ഗോള് നേടിയത്.
