ഭുവനേശ്വര്: വെസ്റ്റ് ഇന്ഡീസിനെതിരായ മൂന്നാമത്തെയും അവസാനത്തെയും മത്സരത്തില് റെക്കോഡിട്ട് രോഹിത് ശര്മ്മ. ഓപ്പണര്മാരില് ഒരു വര്ഷത്തില് 3 ഫോര്മാറ്റിലും ചേര്ത്ത് ഏറ്റവും അധികം റണ്സ് നേടുന്ന താരമായി രോഹിത് മാറി. മത്സരത്തില് 9 റണ്സ് കൂടി നേടിയതോടെയാണ് രോഹിത് പുതിയ റെക്കോഡ് സ്വന്തമാക്കിയത്. ഷെല്ഡന് കോട്രെലിന്റെ ഓവറില് രണ്ട് ബൗണ്ടറികള്ക്കു പിന്നാലെ സിംഗിള് നേടിയതോടെയാണ് രോഹിത് അസുലഭ നേട്ടം സ്വന്തമാക്കിയത്.
മുന് ശ്രീലങ്കന് ഓപ്പണര് സനത് ജയസൂര്യയുടെ പേരിലുണ്ടായിരുന്ന റെക്കോഡാണ് രോഹിത് മറികടന്നത്. ഓപ്പണര്മാരില് അതിവേഗം റണ്സ് സ്കോര് ചെയ്യുന്നതില് എന്നും അതിശയിപ്പിച്ചിരുന്ന ജയസൂര്യ 22 വര്ഷം മുന്പ് നേടിയ ഒരു വര്ഷത്തെ റണ്വേട്ട ഇതുവരെ ആരും മറികടന്നിട്ടില്ലായിരുന്നു. 1997ലായിരുന്നു ജയസൂര്യ റെക്കോഡ് സ്വന്തമാക്കിയിരുന്നത്. 2387 റണ്സായിരുന്നു ജയസൂര്യയുടെ നേട്ടം.
2379 റണ്സുമായാണ് രോഹിത് ശര്മ്മ മൂന്നാം ഏകദിനത്തിനിറങ്ങിയത്. ആദ്യം ബാറ്റ് ചെയ്ത വെസ്റ്റ് ഇന്ഡീസ് 5 വിക്കറ്റ് നഷ്ടത്തില് 315 റണ്സ് നേടിയിരുന്നു. 316 റണ്സ് വിജയലക്ഷ്യവുമായി മറുപടി ബാറ്റിംഗിനിറങ്ങിയ ഇന്ത്യ ഒടുവില് വിവരം ലഭിക്കുമ്പോള് 4 ഓവറില് വിക്കറ്റ് നഷ്ടപ്പെടാതെ 25 റണ്സെന്ന നിലയിലാണ്. കഴിഞ്ഞ ഏകദിനത്തില് രോഹിത്ത് തകര്ത്തടിച്ച് നേടിയ 159 റണ്സിന്റെ വീര്യം ഇന്ത്യക്ക് 107 റണ്സിന്റെ വമ്പന് ജയമാണ് സമ്മാനിച്ചത്.
