ഭുവനേശ്വര്: വെസ്റ്റ് ഇന്ഡീസിനെതിരായ മൂന്നാം ഏകദിനവും വിജയിച്ച് പരമ്പര സ്വന്തമാക്കിയെങ്കിലും അതിലും കടുത്ത മത്സരമായിരുന്നു ഇന്ത്യന് ടീമില് നടന്നത്. 2019ലെ മികച്ച ബാറ്റ്സ്മാന് ആരാണെന്ന് കണ്ടെത്തുന്ന മത്സരത്തിനാണ് കട്ടക്കില് പരിസമാപ്തിയായത്. ആധുനിക ക്രിക്കറ്റിലെ മികച്ച താരങ്ങളായ വിരാട് കോഹ്ലിയും രോഹിത് ശര്മ്മയും മികച്ച റണ്വേട്ടക്കാരാകാന് മത്സരിച്ചപ്പോള് ഗുണം ലഭിച്ചത് ഇന്ത്യന് ടീമിനാണ്.
2379 റണ്സുമായി രോഹിത് ശര്മ്മയും 2370 റണ്സുമായി കോഹ്ലിയും മൂന്നാം ഏകദിനത്തിനിറങ്ങുമ്പോള് ഇരുവരുടേയും മുന്നില് 316 റണ്സെന്ന വിജയലക്ഷ്യവും പരമ്പര വിജയവും മാത്രമാണ് ഉണ്ടായിരുന്നത്. എന്നാല് ഈ വര്ഷത്തെ റണ്വേട്ടക്കാരില് മുന്നിലുണ്ടായിരുന്ന ഇരുവരും മികച്ച ഫോമില് ബാറ്റ് വീശിയപ്പോള് അത് ഇന്ത്യ-വെസ്റ്റ് ഇന്ഡീസ് മത്സരത്തിനപ്പുറം കോഹ്ലി-രോഹിത് മത്സരമായി മാറുകയായിരുന്നു.
ഓപ്പണറായിറങ്ങി ഇന്ത്യക്ക് മികച്ച തുടക്കം നല്കിയ രോഹിത് 63 റണ്സ് നേടിയാണ് മടങ്ങിയത്. ഇതിനിടെ ഓപ്പണര്മാരില് ഒരു വര്ഷത്തില് 3 ഫോര്മാറ്റിലും ചേര്ത്ത് ഏറ്റവും അധികം റണ്സ് നേടുന്ന താരമായി രോഹിത് മാറി. മത്സരത്തില് 9 റണ്സ് കൂടി നേടിയതോടെയാണ് രോഹിത് പുതിയ റെക്കോഡ് സ്വന്തമാക്കിയത്. 1997ല് മുന് ശ്രീലങ്കന് ഓപ്പണര് സനത് ജയസൂര്യ കുറിച്ച 2387 റണ്സെന്ന റെക്കോഡാണ് 22 വര്ഷങ്ങള്ക്കിപ്പുറം രോഹിത് മറികടന്നത്.
കഴിഞ്ഞ മൂന്ന് വര്ഷമായി വിരാട് കോഹ്ലിയുടെ പേരിലുള്ള റെക്കോര്ഡ് രോഹിത് ശര്മ്മ തിരുത്തിക്കുറിക്കുമെന്ന് തോന്നിച്ചെങ്കിലും വിട്ടുകൊടുക്കാന് കോഹ്ലിയും തയ്യാറായിരുന്നില്ല. പൊതുവേ റണ് ചേസില് മികവു പുലര്ത്തുന്ന ഇന്ത്യന് നായകന് ഇത്തവണയും പതിവ് തെറ്റിച്ചില്ല. പ്രതിസന്ധി ഘട്ടത്തിലും ആത്മവിശ്വാസത്തോടെ ബാറ്റുചെയ്ത കോഹ്ലി ഇന്ത്യയെ വിജയത്തോട് അടുപ്പിച്ച ശേഷമാണ് പുറത്തായത്. 85 റണ്സുമായി പുറത്താകുമ്പോള് 2019ല് രോഹിത് ശര്മ്മയെ പിന്നിലാക്കി ഏറ്റവും കൂടുതല് റണ്സ് നേടുന്ന താരമായി കോഹ്ലി മാറിയിരുന്നു.
2455 റണ്സാണ് കോഹ്ലി ഈ വര്ഷം നേടിയത്. രോഹിത്തുമായുള്ള വ്യത്യാസം വെറും 12 റണ്സ് മാത്രം. എന്നാല് രണ്ടാം ഏകദിനത്തിലെ തകര്പ്പന് പ്രകടനത്തിലൂടെ ഒരു കലണ്ടര് വര്ഷത്തില് ഏറ്റവും കൂടുതല് സെഞ്ച്വറികള് നേടുന്ന രണ്ടാമത്തെ താരമായി രോഹിത് മാറിയിരുന്നു. ഇതോടെ 2019ല് മാത്രം 7 സെഞ്ച്വറികളാണ് രോഹിത് സ്വന്തമാക്കിയത്.
ഒരു കലണ്ടര് വര്ഷത്തില് 9 സെഞ്ച്വറികള് നേടിയ സച്ചിന് ടെണ്ടുല്ക്കറാണ് (1998) രോഹിത്തിന് മുന്നിലുള്ളത്. 2019ല് ടെസ്റ്റിലെ 3 സെഞ്ച്വറികള് ഉള്പ്പെടെ ആകെ 10 സെഞ്ച്വറികള് നേടിയ രോഹിത് ശര്മ്മ തന്നെയാണ് ഈ വര്ഷം ഏറ്റവും കൂടുതല് സെഞ്ച്വറികള് നേടിയ താരം.
