ഡല്ഹി: പാകിസ്താന്റെ സ്നൈപ്പര് ആക്രമണങ്ങളെ ചെറുക്കാന് ബുള്ളറ്റ് പ്രൂഫ് ജാക്കറ്റായ ‘സര്വത്ര’ വികസിപ്പിച്ചെടുത്ത ഇന്ത്യന് കരസേനാ ഉദ്യോഗസ്ഥന് ആര്മി ഡിസൈന് ബ്യൂറോയുടെ എക്സലന്സ് അവാര്ഡ്. ആര്മി ടെക്നോളജി സെമിനാറില് വെച്ച് നടന്ന ചടങ്ങില് കരസേനാ മേധാവി ബിപിന് റാവത്ത് അനൂപ് മിശ്രയ്ക്ക് അവാര്ഡ് സമ്മാനിച്ചു.
അതിര്ത്തിയിലെ സൈനികര്ക്ക് പാകിസ്താന്റെ മാരകമായ സ്നൈപ്പര് ആക്രമണങ്ങളെ പ്രതിരോധിക്കാന് ശേഷിയുള്ള ബുള്ളറ്റ് പ്രൂഫ് ജാക്കറ്റാണ് മേജര് അനൂപ് മിശ്ര വികസിപ്പിച്ചെടുത്തത്. കശ്മീര് താഴ് വര, നിയന്ത്രണ രേഖ, തുടങ്ങിയ പ്രദേശങ്ങളില് ഇന്ത്യന് സൈനികര്ക്ക് നേരെ പാകിസ്താന്റെ സ്നൈപ്പര് ആക്രമണങ്ങള് വര്ധിച്ചതോടെയാണ് തദ്ദേശിയമായി ബുള്ളറ്റ് പ്രൂഫ് ജാക്കറ്റ് നിര്മ്മിക്കാന് പദ്ധതി ആരംഭിച്ചത്.
പൂനെയിലെ മിലിട്ടറി എഞ്ചിനീയറിംഗ് കോളേജിലാണ് സ്നൈപ്പറിനെ തകര്ക്കുന്ന രക്ഷാ കവചമായ സര്വത്ര ജാക്കറ്റ് നിര്മ്മിച്ചത്. സൈനികരുടെ ശരീരത്തെ മുഴുവനായി സംരക്ഷിക്കുന്ന തരത്തിലാണ് ജാക്കറ്റ് രൂപകല്പന ചെയ്തിരിക്കുന്നത്. കശ്മീര് താഴ് വരയിലെ ഭീകര വിരുദ്ധ പ്രവര്ത്തനങ്ങള് നടത്തുന്ന സൈനികര്ക്ക് ഇതിനോടകം തന്നെ 40,000-ത്തിലധികം ജാക്കറ്റുകള് സൈന്യം വിതരണം ചെയ്തിരുന്നു.
ഏ.കെ 47-നില് നിന്നു വരുന്ന വെടിയുണ്ടകള് പോലും ചെറുക്കാന് സര്വത്രയ്ക്ക് കഴിയുമെന്നാണ് അനൂപ് മിശ്ര വ്യക്തമാക്കിയത്. നിരവധി പരീക്ഷണങ്ങള്ക്ക് ശേഷമാണ് ജാക്കറ്റ് അവതരിപ്പിച്ചിരിക്കുന്നതെന്ന് മേജര് അനൂപ് മിശ്ര കഴിഞ്ഞ ദിവസം പറഞ്ഞിരുന്നു. ഇന്ത്യന് സൈനികര്ക്കായി ഇവ വലിയ തോതില് നിര്മ്മിക്കുന്നതിനായി പ്രതിരോധ രംഗത്തെ അംഗീകൃത പങ്കാളികളില് നിന്നും ടെണ്ടര് ക്ഷണിക്കാന് ഒരുങ്ങുകയാണെന്നാണ് സേന അറിയിച്ചത്.