ന്യൂഡല്ഹി: ഇന്ത്യന് സേനാ വിഭാഗങ്ങളാണ് മനുഷ്യാവകാശ നിയമത്തെ ഏറെ ബഹുമാനിക്കുകയും ഉള്ക്കൊള്ളുകയും ചെയ്യുന്നവരെന്ന് കരസേനാ മേധാവി ജനറല് ബിപിന് റാവത് പറഞ്ഞു. സേനകള് മനുഷ്യാവകാശ നിയമങ്ങള് പാലിക്കുന്നവര് മാത്രമല്ല ഒപ്പം അതിനെതിരായി ഉടലെടുക്കുന്ന പ്രശ്നങ്ങളില് നിന്ന് സമൂഹത്തിനെ സംരക്ഷിക്കുകയും ചെയ്യുന്നതായും റാവത് സൂചിപ്പിച്ചു.
രാജ്യ തലസ്ഥാനത്തെ മാനവ് അധികാര് ഭവനില് ദേശീയ മനുഷ്യാവകാശ കമ്മീഷന്റെ സംഘാടകത്വത്തില് സംഘടിപ്പിച്ച സെമിനാറിലാണ് കലസേനാ മേധാവി എന്എച്ച് ആര്സിയുടെ പുതുതായി നിയമിക്കപ്പെട്ട ഉദ്യോഗസ്ഥര്ക്കും നിലവിലെ മുതിര്ന്ന ഉദ്യോഗസ്ഥര്ക്കും മുന്നില് സേനാ നയം വ്യക്തമാക്കിയത്. ‘ യുദ്ധസമയത്തും യുദ്ധാനന്തര തടവുകാരോടുമുള്ള പൊതു മനുഷ്യാവകാശ സംരക്ഷണം’ എന്ന വിഷയത്തിലാണ് സെമിനാര് നടന്നത്.
‘ഏറ്റവും അച്ചടക്കമുള്ളവരാണ് ഇന്ത്യന് സേന മാത്രമല്ല മനുഷ്യാവകാശങ്ങള് ഏറെ ശ്രദ്ധയോടെ കൈകാര്യം ചെയ്യുന്നവരുമാണ്. ജനീവ കരാറിന്റെ ഭാഗമായുള്ള എല്ലാ നിയമങ്ങളും യുദ്ധത്തടവുകാരോടുള്ള മര്യാദവിടാതെയുള്ള സമീപനത്തിലും എന്നും പാലിക്കുന്നവരുമാണ് ‘ റാവത് വ്യക്തമാക്കി.
